En Svizra assista mintga quarta persuna ina confamigliara u in confamigliar. Quest engaschament n'è betg mo prezius ed impurtant per la persuna assistida, mabain er per la societad. Ils 30 d'october, il Di naziunal dals confamigliars che gidan, di il chantun Grischun perquai –ensemen cun differentas organisaziuns professiunalas – grazia!

Mintga quarta persuna en Svizra assista u tgira in confamigliar. Savens survegnan persunas malsaunas, attempadas u che han gì in accident uschia la pussaivladad da viver vinavant en lur ambient usità. L'engaschament da las persunas che assistan lur confamigliars en l'ambient famigliar e davos las culissas è immens. Las persunas che assistan lur confamigliars daventan uschia eroxas ed eroxs invisibels.

Enconuscher ils agens cunfins
Las persunas che assistan lur confamigliars na s'occupan betg mo da la persuna da confidenza, mabain er da ses e da l'agen mintgadi. Quai na fan ellas betg darar suenter la lavur u suenter la scola, e per motivs multifars: Ultra da l'affecziun èn savens er decisivas la conscienziusadad u las aspectativas da la famiglia, da la religiun u da la societad. Uschia emblidan las persunas che assistan lur confamigliars savens da s'occupar da sasezzas. Ellas surpassan lur cunfins fisics e psichics e na pensan betg a lur atgna sanadad. «L'assistenza da confamigliars è ina prestaziun extraordinaria. Perquai èsi impurtant, che las persunas che assistan lur confamigliars possian er guardar da lur agen bainstar, per ch'ellas sezzas restian saunas», di il cusseglier guvernativ Peter Peyer, schef dal Departament da giustia, segirezza e sanadad.

En il Grischun datti las pli differentas purschidas da sustegn spezialmain per persunas che assistan e tgiran lur confamigliars. Quellas tanschan d'agids da mintgadi sco porscher in servetsch da transport u prestar agid per far cumpras, sur sustegnair en la tgira fin dar ina cussegliaziun giuridica. Bleras organisaziuns cusseglian gratuitamain ils confamigliars. Per las persunas che tgiran lur confamigliars sco talas stattan a disposiziun purschidas da distgargia, per exempel congedis. Fitg impurtant è: Ils confamigliars pon e duain far diever da questas purschidas cun buna conscienza. La finala è lur sanadad la basa per dumagnar l'agen mintgadi ed il mintgadi da la persuna assistida.

Grazia a tut las eroxas ed a tut ils eroxs invisibels!
Ils 30 d'october è il Di interchantunal dals confamigliars che gidan. Quest di prenda il chantun Grischun sco occasiun per ENGRAZIAR a tut quellas e quels che s'engaschan per lur confamigliars attempads, malsauns u che han gì in accident. La campagna «Grazia, eroxas ed eroxs invisibels!» mussa l'impurtanza e la gronda significaziun che l'engaschament da las persunas che assistan ha. Ultra da quai exprima il chantun Grischun ses engraziament – ensemen cun differentas organisaziuns spezialisadas – durant quest di cun pitschens gests. Gidai er Vus e mussai appreziaziun. Cuminaivlamain vulain nus procurar, ch'il Di dals confamigliars che gidan survegnia l'impurtanza ch'el merita e cuminaivlamain vulain nus render visiblas nossas eroxas e noss eroxs invisibels.

Ulteriuras infurmaziuns sco er in register da las purschidas da distgargia e da sustegn chattais Vus sut www.angehoerige-betreuen.gr.ch.

Agiunta:

Campagna per il Di internaziunal dals confamigliars che gidan

Infurmaziuns:

Denise Rudin, manadra da la partiziun Promoziun da la sanadad e prevenziun, Uffizi da sanadad, tel. +41 81 257 64 02, e‑mail Denise.Rudin@san.gr.ch

Responsabladad: Uffizi da sanadad