Oz glindesdi han la cussegliera guvernativa Carmelia Maissen ed il cusseglier guvernativ Peter Peyer avert uffizialmain a Roveredo la nova halla da controlla da l'Uffizi chantunal per il traffic sin via. Il nov edifizi ch'è situà directamain a l'access a l'autostrada persvada en spezial cun sia moda da construcziun persistenta.

«Cun quest edifizi nov ha il chantun pudì stgaffir in nov post modern en il Mesauc. Ussa èsi pussaivel da far las controllas da vehichels necessarias sco er ils examens da manischar e da teoria en in unic lieu en localitads cun in equipament modern», di Claudio Reich, manader da l'Uffizi per il traffic sin via. En la nova halla ed en las localitads appartegnentas po l'Uffizi per il traffic sin via controllar tut ils vehichels fin 3,5 tonnas. Ultra da la sedia principala a Cuira maina l'uffizi otg posts externs en il chantun, nua ch'el fa controllas da vehichels ed examens da manischar. Cun quest sistem decentralisà tegna l'Uffizi per il traffic sin via quint da la vasta topografia dal Grischun. Tenor Reich na fissi ni ecologicamain ni economicamain raschunaivel da l'Uffizi per il traffic sin via da pretender da sia clientella da far lungs viadis mo per laschar controllar ses vehichels.

In exempel per renunzia, localitad e reutilisaziun
«Il plaschair da quest edifizi reussì, che permetta da controllar ils vehichels da las proximas generaziuns d'automobilistas ed automobilists en il Mesauc, è grond», di la cussegliera guvernativa Carmelia Maissen, scheffa dal Departament d'infrastructura, energia e mobilitad, a chaschun da l'avertura uffiziala a Roveredo. La nova halla da controlla n'ademplescha betg mo fermamain las pretensiuns dals experts, mabain persvada er tras ina moda da construcziun persistenta.

L'edifizi è effizient areguard l'energia e schanegia las resursas. Sapientivamain han ins desistì da tractar las surfatschas exteriuras e da duvrar liadiras, cuvridas da palantschieus e da paraids. Er han ins installà uschè pauca tecnica sco pussaivel, e l'electricitad vegn producida cun moduls da fotovoltaica a las fatschadas e sin tetg. L'edifizi è construì cumplettamain da lain svizzer, il lain da laresch da la fatschada deriva dal Mesauc. Plinavant è l'entir areal ordadora vegnì cuvert cun craps da salaschada ch'ins ha retratg da la via dal vitg da Mesocco. «La nova halla da controlla è ina construcziun exemplarica en quai che concerna la renunzia, la collavuraziun cun interpresas localas e l'economia circulara», accentuescha l'architect chantunal Andreas Kohne.

Interpresas localas involvidas
Stgars 90 pertschient da la summa da construcziun han ins pudì surdar ad interpresas dal Mesauc e laschar exequir las lavurs da talas. Responsabels per il project da construcziun èn stads il biro Cereghetti & Bruni architetti sa da Mesocco sco er in team da planisaders spezialisads, che ha realisà las prescripziuns dal patrun e sustegnì il project cun atgnas ideas. Ils custs per il project sa movan en il rom dal credit da 2,7 milliuns francs. Il Cussegl grond aveva approvà quest credit en la sessiun da december 2022. «Jau hai plaschair ch'il chantun ha pudì stgaffir cun questa infrastructura novs plazs da lavur moderns per l'Uffizi per il traffic sin via», di Peter Peyer, schef dal Departament da giustia, segirezza e sanadad.

Fotografias agiuntadas:

Foto 2, Foto 3, Foto 4, Foto 5

© Romina Berri, Fotografa AFC

Infurmaziuns:

• Andreas Kohne, architect chantunal, Uffizi da construcziun auta, tel. +41 81 257 36 31 (cuntanschibel da las 12.00 fin las 13.30), e‑mail Andreas.Kohne@hba.gr.ch
• Claudio Reich, manader da l'Uffizi per il traffic sin via, tel. +41 81 257 80 01 (cuntanschibel da las 15.00 fin las 16.00), e‑mail Claudio.Reich@stva.gr.ch

Responsabladad: Uffizi da construcziun auta