La contribuziun als custs da viver per persunas che retiran agid social, vegn adattada per il 1. da schaner 2025 al svilup dals pretschs e dals salaris. Il basegn fundamental per ils custs da viver vegn auzà per 2,9 pertschient da 1031 a 1061 francs. Per quest intent ha la Regenza approvà ina revisiun parziala da las Disposiziuns executivas tar la Lescha chantunala da sustegn.

Tenor las Directivas da la Conferenza svizra da l'agid social (Directivas da la COSAS) vegn il basegn fundamental per ils custs da viver adattà confurm al svilup dals pretschs e dals salaris, ch'è decisiv per la renta da la AVS/AI. Ils 28 d'avust 2024 ha il Cussegl federal decidì d'adattar las rentas da la AVS/AI per il 1. da schaner 2025 al svilup actual dals pretschs e dals salaris e d'auzar ellas per 2,9 pertschient. Tenor las Directivas da la COSAS e tenor la recumandaziun da la Conferenza da las directuras e dals directurs chantunals dals affars socials dals 8 da november 2024 duai il basegn fundamental vegnir adattà il pli tard per il 1. da schaner 2026 al svilup da las rentas. Confurm a quai vegn il basegn fundamental augmentà en il chantun Grischun per l'onn 2025.

La Regenza ha approvà la cumplettaziun dal Plan directiv chantunal cun il chapitel 5.5 «Prevenziun d'incaps relevants» dals 11 da november 2024 ed ha declerà questa cumplettaziun sco lianta per las autoritads dal chantun Grischun. Cun questa cumplettaziun dal Plan directiv ademplescha il chantun Grischun las pretensiuns da la legislaziun federala en il sectur da la prevenziun d'incaps relevants.

In incap relevant è in eveniment extraordinari en in lieu da producziun, en in lieu da deposit u sin ina via da traffic, che ha influenzas negativas considerablas per l'ambient circumdant e per la populaziun pertutgada. En spezial la producziun, il transport ed il deposit da carburants, da combustibels e da chemicalias signifitgan in privel. La prevenziun d'incaps relevants ha l'intent d'evitar accidents sco quel da l'onn 2009 en la staziun da Viareggio(I), nua ch'in tren da martganzia cun butan liquid èì sur ils binaris ora, cun la consequenza che explosiuns han chaschunà circa 30mortoris. Perquai prevesa la legislaziun federala ch'ils chantuns resguardian la prevenziun d'incaps relevants en la planisaziun directiva ed en la planisaziun d'utilisaziun sco er en lur ulteriuras activitads che han in effect sin il territori (art.11 al. 1 da l'Ordinaziun davart ils incaps relevants).