La Regenza ha decidì d'introducir per il 1. da schaner 2025 ina co-direcziun per l'Uffizi da chatscha e pestga (UCP). La direcziun cuminaivla da l'uffizi surpiglian il manader actual da l'uffizi Adrian Arquint sco er il vicemander da l'uffizi da fin ussa Marcel Michel. Ils dus co-manaders da l'uffizi han mintgin in pensum dad 80 pertschient.

Ils ultims onns èn las incumbensas dal UCP vegnidas extendidas e la chargia da lavur da l'uffizi è creschida fitg. Incità quest svilup han novas prescripziuns legalas sco er midadas da las cundiziuns da l'ambient e da las cundiziuns generalas en differents secturs. Dal punct da vista organisatoric è l'uffizi uschia sa sviluppà vinavant pass per pass. L'ultim term impurtant da quest svilup è la reorganisaziun da la direcziun da l'uffizi. En spezial sto il tractament dals animals ch'èn returnads e che pon chaschunar conflicts, sco animals da rapina gronds, casturs u ludras, vegnir accumpagnà stretgamain da la direcziun da l'uffizi. Quests secturs tematics fruntan er en la publicitad sin grond interess. La direcziun da l'uffizi sto represchentar en moda cumpetenta vers anora ils temas specifics surordinads e sustegnair vers anen las partiziuns pertutgadas en connex cun las decisiuns ch'èn da prender.

Stgaffir cundiziuns generalas per pussibilitar models da topsharing e da jobsharing correspunda a la strategia da persunal dal chantun. Las stentas da posiziunar l'administraziun chantunala sco patruna da lavur innovativa sin il martgà ed uschia er da far frunt a la mancanza pli e pli acuta da persunas spezialisadas, vegnan sustegnidas explicitamain cun l'introducziun situativa da novas furmas da lavur, sco il nov model da direcziun per il UCP.

La Regenza ha approvà ina nova cunvegna da prestaziun tranter il chantun Grischun e l'uniun Caritas Grischun per ils onns 2025 fin 2028. La finamira da l'incarica da prestaziun è quella da porscher a persunas pertutgadas da povradad ed a persunas sustegnidas da la publicitad agid en chaussas administrativas, da garantir ina pussaivladad da far cumpras pli favuraivlas e da promover l'integraziun cun agid da prestaziuns sco il Martgà Caritas, il Center Caritas ed ils cafés. Per la perioda da prestaziun 2025 fin 2028 ha la Regenza concedì ina contribuziun chantunala da 140 000 francs per onn.

La Caritas Grischun è in'uniun d'utilitad publica ch'è commembra da la federaziun naziunala ed internaziunala da la Caritas. La Caritas Grischun porscha agid a persunas pertutgadas da povradad ed a persunas dischavantagiadas en il Grischun. L'agid vegn furnì en furma d'infurmaziun, da cussegliaziun u da sustegn material. L'agid duai esser svelt, intenziunà sco er solid. Per ils servetschs socials regiunals è l'uniun ina partenaria impurtanta.

© Corinne Sägesser

La Regenza ha approvà il project da las vischnancas da Schluein, Falera ed Ilanz/Glion per la correcziun da la Val da Schluein e garantescha ad ellas ina contribuziun da circa 4,49 milliuns francs tenor la Lescha davart la correcziun dals curs d'aua. Ultra da quai ha ella concedì ina contribuziun chantunala tenor la Lescha davart las vias da var 1,89 milliuns francs als custs totals dal project da var 22,45 milliuns francs.

Il torrent da la Val da Schluein ha numerus rempars ed è chanalisà en la part sura dal cugn. En il territori Parlet sa chattan trais auts rempars da torrent cun in'autezza totala da var 27meters. Betg lunsch sut la punt da la via chantunala (via sursilvana H19) finescha la chanalisaziun. Il sectur che suonda è cuvert cun guaud e fa part da la zona umida Cauma, ina zona umida d'impurtanza naziunala. Tenor la charta da privels sa chatta ina part considerabla dal torrent en la zona da privel blaua u cotschna. En la zona da privel cotschna èn situads plirs edifizis, per part er edifizis d'abitar. La punt da la via chantunala (sur la Val da Schluein vi) è vegnida construida da nov l'onn 2018. Partind dal fatg ch'ils rempars sajan intacts, resista la punt nova ad aua gronda. L'avust 2004 ha però ina gronda bova chaschunà gronds donns a Schluein: Var 30000 meters cubic material èn vegnids depositads, la capacitad da deflussiun era exausta e plirs edifizis èn vegnids donnegiads. Bain èn intgins da quests rempars vegnids reparads fin l'onn 2007, ina retschertga dal 2013 ha dentant mussà, ch'igl exista in basegn da sanaziun considerabel. L'onn 2020 ha in'ulteriura retschertga mussà in cler pegiurament, cunzunt en la Val da Tschessas. Il stadi dals rempars vegn giuditgà sco preoccupant, quai che pretenda mesiras urgentas, perquai che er edifizis d'abitar sa chattan en la zona cotschna.

En il rom dal project duain vegnir reparads ils rempars da torrent donnegiads en l'intschess pertutgà. Ultra da quai èsi planisà da construir in nov collectur da glitta en il territori Cleus, da sanar il chanal da deflussiun cun auzaments da la riva e cun ina protecziun cunter erosiun en il territori d'abitadi sco er da construir in rempar da protecziun per la serenera e per il territori da mastergn. Vitiers vegnan mesiras accumpagnantas, numnadamain ina deponia che vegn endrizzada aposta per quest project e ch'è destinada per material da stgavament net, sco er la realisaziun da las mesiras da cumpensaziun necessarias per pudair utilisar vinavant ils indrizs publics existents (vias, sendas, punts, conducts d'ovra e.u.v.), e la realisaziun da las mesiras da cumpensaziun ecologicas. Questas mesiras da cumpensaziun sa concentreschan principalmain sin la revalitaziun da la zona umida Cauma.

 

La Regenza ha approvà il project «Ovra idraulica d'aua da baiver Palza d'Ent» da la vischnanca da Bregaglia. La vischnanca ha l'intenziun da trair a niz – en il rom da l'atgna utilisaziun – l'abundanza d'aua da las funtaunas Bürdagh en l'ovra idraulica d'aua da baiver Palza d'Ent sper la Maira e da producir electricitad cun questa aua. Ils custs totals importan circa 1,05 milliuns francs.

Gia oz vegn l'aua tschiffada davent da circa 1554 meters sur mar cun las tschiffadas existentas. Da nov duai l'aua vegnir returnada sin circa 889 meters sur mar a la Maira. Per quest intent èsi previs da construir ina nova centrala cun conduct da deflussiun en la Maira. Las mesiras da construcziun pertutgan stgavaments en il sectur dals batschigls collecturs Bürdagh (per stabilir l'aua restanta), la construcziun d'in bypass tar il batschigl Montaccio sco er lavurs da betun en tscherts puncts da l'ultim traject dal conduct da pressiun, quai per segirar ils secturs cun stortas. Il stabiliment planisà ha ina quantitad d'aua utilisada da 26 liters per secunda. Tar ina prestaziun totala da 130 kilowatts quintan ins cun ina producziun d'electricitad da circa 646 uras megawatt per onn.