D'ina vart prevesa il project d'extender sin il transport d'autos l'instrument da las garanzias solidaricas, che vegn applitgà en il traffic regiunal da persunas (TRP). Uschia vegn reducida la grevezza da tschains per las interpresas che transportan autos, e la finala vegn diminuida l'indemnisaziun per ils empustaders. La Regenza beneventa quests fatgs. Percunter na sustegna la Regenza betg ils plans da restrenscher l'instrument sin transports d'autos che na vegnan betg manads sin agen quint sco er sin transports d'autos che vegnan empustads da la Confederaziun.

Da l'autra vart prevesa il project da midar da la finanziaziun à fonds perdu ad ina finanziaziun estra dal material rullant. La Regenza renda attent al fatg, che quai chaschunass custs bler pli auts per las gestiunarias pervia da las investiziuns necessarias e che quests custs na pudessan betg vegnir gulivads cun augmentar ils pretschs. La Surveglianza dals pretschs (SPR) e la Cumissiun da concurrenza (CUMCO) na permettessan betg quai. Cun il transport d'autos tras il Veraina è il chantun Grischun pertutgà fermamain da la midada planisada, perquai che praticamain tut il material rullant dal Veraina sto vegnir remplazzà respectivamain cumplettà cun locomotivas supplementaras ils proxims onns. Ils custs supplementars che resultan stuessan vegnir cuvrids tras indemnisaziuns pli autas da la Confederaziun en la sparta «infrastructura» respectivamain en il fond per l'infrastructura da viafier (FIV).

Documents da consultaziun

Ord la finanziaziun speziala Sport ha la Regenza concedì contribuziuns da totalmain 1,25 milliuns francs a las organisaziuns che fan part da l'Associaziun grischuna da sport (AGS). En la sessiun d'october 2023 ha il Cussegl grond auzà la contribuziun pauschala annuala dad 1 milliun francs, che ha valì dapi l'onn 2010 per las associaziuns da sport grischunas. Oravant tut il sport da massa duai profitar da quest augment. Las associaziuns da sport grischunas prestan ina lavur da basa impurtanta per promover il sport da massa e da prestaziun. Cun las contribuziuns pauschalas per la lavur generala da las associaziuns e da las uniuns sustegna il chantun las prestaziuns da las 41 organisaziuns da sport a favur da las uniuns da sport grischunas.