Suenter che las votantas ed ils votants han refusà l'engrondiment dal Museum Kirchner, na po l'emprest permanent planisà da la collecziun privata Ulmberg betg vegnir exponì a Tavau. Per il Museum d'art dal Grischun a Cuira resultan uschia novas perspectivas. Ensemen cun il collectader vegni perquai examinà, sch'ina part da sias ovras pudess vegnir messa a disposiziun al Museum d'art dal Grischun sco emprest permanent.

La collecziun Ulmberg è ina da las pli impurtantas collecziuns europeicas da la moderna classica. Ella cumpiglia ovras d'artistas e d'artists che han ina stretga colliaziun cun Ernst Ludwig Kirchner e cun il moviment expressiunistic, per exempel Max Beckmann, Emil Nolde, Louise Bourgeois u Lyonel Feininger. Cumplettada vegn la collecziun tras ovras contemporanas da renum sco er tras l'art concret.

Per il Museum d'art dal Grischun porscha questa collecziun extraordinaria novas perspectivas interessantas. Ella cumplettass ils accents da la collecziun existenta ed enritgiss quels cun fassettas supplementaras, che rinforzassan duraivlamain l'attracziun naziunala ed internaziunala dal museum. «Sch'il Grischun survegniss ina da las pli impurtantas collecziuns da l'Europa, fiss quai in grond gudogn per la scena d'art e da cultura da noss chantun», accentuescha il president da la Regenza Jon Domenic Parolini.

Infurmaziuns:

President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient. Las dumondas vegnan coordinadas dad Yvonne Brigger, responsabla per la communicaziun dal Departament d'educaziun, cultura e protecziun da l'ambient, tel. +41 81 257 44 66 (cuntanschibla da las 10.00 fin las 11.00), e‑mail Yvonne.Brigger@ekud.gr.ch