La Regenza ha deliberà duas missivas tar la revisiun parziala da la Lescha davart ils dretgs politics en il chantun Grischun per mauns dal Cussegl grond. L'emprima missiva cuntegna ina nova regulaziun da la via da recurs tar elecziuns dal Cussegl grond e duas rectificaziuns formalas concernent las decisiuns tras la sort e la regulaziun da la verificaziun dal scrutini. La segunda missiva cuntegna l'introducziun dal cedel electoral per far ina crusch. Quel simplifitgescha las elecziuns da la Regenza, da las dretgiras regiunalas e dal Cussegl dals chantuns.

Tuttas duas revisiuns pertutgan disposiziuns ch'èn regladas en la Lescha davart ils dretgs politics en il chantun Grischun. Perquai che las duas revisiuns n'han nagin context tematic, ha la Regenza deliberà duas missivas separadas.

Midada da la via da recurs tar elecziuns dal Cussegl grond e rectificaziuns formalas
Il punct principal da l'emprima revisiun parziala è la nova regulaziun da la via da recurs tar elecziuns dal Cussegl grond. Oz ston recurs pervia da la violaziun dal dretg da votar e pervia dad irregularitads tar la preparaziun e tar la realisaziun da las elecziuns dal Cussegl grond vegnir drizzads en emprima instanza al Cussegl grond. Cunter sia decisiun poi vegnir recurrì sin plaun chantunal tar la Dretgira superiura. Cun il nov sistem electoral da proporz (Pukelsheim dubel) per las elecziuns dal Cussegl grond n'è il Cussegl grond apparentamain betg pli l'instanza da recurs adattada. Perquai duain tals recurs pudair vegnir fatgs en l'avegnir directamain tar la Dretgira superiura sco suletta instanza chantunala. A medem temp duai vegnir profità da la revisiun parziala per realisar duas adattaziuns formalas concernent la decisiun tras la sort ed areguard la regula¬ziun da la verificaziun dal scrutini.

Cedels electorals per far ina crusch
Cun la segunda revisiun parziala proponida duain vegnir stgaffidas las basas legalas necessarias per vuschar a l'urna en scrit cun cedels electorals per far ina crusch, quai per las elecziuns da maiorz da la Regenza, da las dretgiras regiunalas e dal Cussegl dals chantuns. Uschia duai l'elecziun – analogamain al e-voting – vegnir simplifitgada cun far ina crusch tar ils nums da las candidatas e dals candidats giavischads sin cedels electorals prestampads. Plinavant duai vegnir ademplida l'incumbensa da la fracziun da la PBD concernent la simplificaziun da la procedura electorala, ch'è vegnida acceptada dal Cussegl grond l'onn 2019.

Agiuntas:

• Missiva tar la revisiun parziala da la Lescha davart ils dretgs politics en il chantun Grischun concernent la midada da la via da recurs tar elecziuns dal Cussegl grond e rectificaziuns formalas
• Missiva tar la revisiun parziala da la Lescha davart ils dretgs politics en il chantun Grischun concernent ils cedels electorals per far ina crusch

Infurmaziuns: