En il sectur da la chavorgia da Versomi ston vegnir montadas raits cunter crudadas da crappa per proteger in plazzal planisà. Mardi, ils 11 da favrer 2025, vegnan fatgs ils scleriments geologics necessaris. Per quest motiv sto la Via da Versomi vegnir serrada temporarmain. Las automobilistas ed ils automobilists pon sviar sur Flem.

Durant l'onn current vul l'Uffizi da construcziun bassa dal Grischun (UCB) renovar ils mirs da sustegn e da balustrada en la chavorgia da Versomi, quai sin in traject da via da var 100 meters lunghezza. Las paraids-crap praticamain verticalas han in'autezza da fin 75 meters, mesirà davent dal nivel da la via. Sin quest traject han ins pli e pli savens constatà crudadas da crappa. Per garantir la segirezza da las collavuraturas e dals collavuraturs sin il plazzal montescha l'Uffizi da construcziun bassa raits cunter crudadas da crappa.

Via serrada l'avantmezdi ed il suentermezdi
Las relaziuns geologicas sur e sut la via vegnan scleridas cun agid d'ina crana. Plinavant vegn il UCB ad allontanar a maun material dal grip. Las lavurs vegnan fatgas mardi, ils 11 da favrer 2025, en duas etappas, da las 08.00 fin las 11.30 e da las 13.30 fin las 17.00. Durant quest temp è la Via da Versomi serrada. Las automobilistas ed ils automobilists pon sviar sur Flem. Ciclistas e ciclists sco er pedunas e peduns pon passar il plazzal. Las organisaziuns a glisch blaua pon er passar da tut temp il plazzal.

Il UCB sa stenta da minimar tant sco pussaivel las restricziuns cun quest proceder.

Fotografia agiuntada:

© InfraGeo SA

Infurmaziuns:

Ralf Hartmann, schef dal district 1 Cuira, Uffizi da construcziun bassa, tel. +41 81 257 57 01 (cuntanschibel da las 10.00 fin las 11.00), e‑mail Ralf.Hartmann@tba.gr.ch