A Zizers examinescha l'Uffizi da construcziun bassa dal Grischun ina nova ampla da traffic parzialmain automatisada per regular il traffic. Cun questa emprova da pilot duai vegnir optimada la circulaziun dal traffic durant ils dis cun grond traffic ed a medem temp duai vegnir minimada la chargia per las abitantas ed ils abitants. L'indriz è vegnì mess en funcziun la fin d'emna.

L'enviern èn cunzunt ils lieus per lung da la A28 – numnadamain Jenaz, Schiers, Grüsch, Seewis, Zizers e Landquart Ost – pertutgads dal traffic da guntgida che chaschuna savens colonnas. La primavaira e la stad chaschuna il fitg grond volumen da traffic durant tscherts dis er per lung da la A13 adina puspè colonnas tranter Tusaun ed il cunfin chantunal. Las mesiras ch'èn vegnidas prendidas fin ussa, han cuntanschì ils effects giavischads. L'Uffizi da construcziun bassa dal Grischun (UCB) fa ussa in ulteriur pass ed examinescha in'ampla da traffic parzialmain automatisada a Zizers per optimar la regulaziun dal traffic.

Tecnica innovativa per dapli effizienza e segirezza
L'indriz parzialmain automatisà registrescha ils dumbers da traffic en temp real, quai che pussibilitescha ina regulaziun dinamica. A las utilisadras ed als utilisaders da la via vegn communitgà – sur in monitur dad LED – il motiv per la mesira, sco per exempel «Surchargia dal traffic en il center dal vitg». Il medem mument vegn mussà quant ch'i dura fin la proxima fasa verda. La finamira è d'obtegnair ina circulaziun pli effizienta, uschia ch'il traffic sa mova en moda concentrada durant las fasas verdas. Uschia duai la quantitad da passagi vegnir augmentada. Cun il traffic rudlant vul ins minimar las grevezzas per la populaziun en il vitg e garantir sia protecziun.

Fasas da test durant il manaschi d'enviern e da stad
L'indriz è vegnì mess en funcziun sonda, ils 8 da favrer 2025 , ed el vegn examinà – ensemen cun las mesiras etablidas – en in manaschi da test durant l'enviern e la stad. Questa fasa serva ad agiustar detagliadamain l'indriz, ed ella vegn realisada en ina stretga coordinaziun tranter il UCB, la Polizia chantunala dal Grischun ed il traffic public. Uschia vul ins optimar ils andaments e garantir il manaschi ordinari.

Las enconuschientschas dal manaschi da test servan al UCB sco basa per examinar, sche questa tecnologia è adattada er per il traffic quotidian en auters lieus. La finamira a lunga vista è l'integraziun da questa soluziun en in dispositiv da traffic cumplessiv che reagescha en moda flexibla ed effectiva sin differentas grevezzas da traffic.

Zizers sco lieu-clav per l'ulteriur svilup
Il UCB ha tschernì strategicamain Zizers sco lieu da realisaziun: «Las experientschas dals onns passads han mussà, che a Zizers na sa concentrescha il traffic betg mo durant ils mais d'enviern, mabain durant l'entir onn», di l'inschigner chantunal Reto Knuchel. Cunzunt durant las uras cun traffic intensiv durant las fins d'emna u ils firads èn las abitantas ed ils abitants confruntads cun colonnas e cun traffic da guntgida.

«Cun il project da pilot examinain nus ina soluziun che n'optimescha betg mo la circulaziun dal traffic a Zizers, ma che distgargia er ils abitadis en la vischinanza. Grazia a sia situaziun da traffic strategica porscha Zizers plinavant premissas idealas, per obtegnair enconuschientschas e per installar pli tard indrizs sumegliants per lung da las axas da traffic principalas», cuntinuescha Reto Knuchel.

Fotografias agiuntadas:

Foto 2

Infurmaziuns:

• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 10.00 fin las 11.00), e‑mail Reto.Knuchel@tba.gr.ch
• Andreas Pöhl, manader Gestiun dal traffic, Uffizi da construcziun bassa dal Grischun, tel. +41 81 257 37 62 (cuntanschibel da las 08.00 fin las 11.00), e‑mail Andreas.Poehl@tba.gr.ch