La Regenza propona ina nova Lescha per promover abitaziuns en il chantun Grischun. Questa lescha cuntegna per l'ina l'extensiun da l'instrument da promoziun existent che serva a meglierar las relaziuns d'abitar en il territori da muntogna e per l'autra in nov instrument che gida ils purtaders d'abitaziuns d'utilitad publica a construir abitaziuns da locaziun favuraivlas. La Regenza ha deliberà la missiva per mauns dal Cussegl grond per la tractar en la sessiun da zercladur 2025.

Cun la nova lescha duai vegnir tegnì quint dals svilups e da las discussiuns areguard la stgarsezza e l'augment dals pretschs d'abitaziuns. La situaziun sin il martgà d'abitaziuns è er vegnida tematisada pliras giadas en il Cussegl grond. Quel ha surdà duas incumbensas a la Regenza per adattar la promoziun da la construcziun d'abitaziuns sco er per stgaffir la basa legala per promover emprimas abitaziuns pajablas.

Igl è ina sfida da sclerir la situaziun sin il martgà d'abitaziuns en il Grischun e da la giuditgar correspundentamain. Per far in'analisa che permettess da deducir il basegn d'agir precis, è la situaziun generala da las datas davart las differentas problematicas memia pauc marcanta. In'ulteriura difficultad per ina promoziun chantunala èn las grondas differenzas regiunalas areguard la purschida d'abitaziuns ed areguard il svilup dals pretschs per abitaziuns da locaziun e per chasas da proprietad. Perquai èsi impurtant, ch'i vegnian prendidas mesiras en il senn d'ina politica da terren e d'abitaziuns activa er sin plaun communal e che las reservas da terren da construcziun vegnian mobilisadas.

Sustegn per persunas en relaziuns finanzialas modestas en il territori da muntogna
Cun la nova lescha vegn extendì l'instrument existent per «meglierar las relaziuns d'abitar en il territori da muntogna». Dapli persunas e famiglias duain pudair dumandar meds da promoziun per acquistar, construir u renovar u in'abitaziun u ina chasa da proprietad. Per quest intent vegnan per l'ina auzadas las limitas d'entrada e da facultad e per l'autra augmentads ils meds da promoziun.

Per «meglierar las relaziuns d'abitar en il territori da muntogna» èn previs da nov almain 2 fin maximalmain 5 milliuns francs per onn. Per l'onn 2026 duai vegnir integrà l'import da 2,5 milliuns francs en il preventiv.

Nova promoziun dals purtaders d'abitaziuns d'utilitad publica
Per construir abitaziuns da locaziun favuraivlas è previs in nov instrument da promoziun. Als purtaders d'abitaziuns d'utilitad publica ch'èn organisads en associaziuns vegnan concedids emprests a tschains moderads. Quests emprests vegnan concepids per cumplettar la promoziun federala correspundenta: sch'ils purtaders d'abitaziuns d'utilitad publica survegnan emprests a tschains moderads da la Confederaziun per construir, per acquistar e per renovar abitaziuns da locaziun favuraivlas, paja il chantun ina promoziun cumplementara da la medema autezza a las medemas premissas e cundiziuns.

Sin plaun chantunal pon supplementarmain vegnir pajadas contribuziuns à fonds perdu als purtaders d'abitaziuns d'utilitad publica. Questas contribuziuns duain servir a procurar l'agen chapital necessari ed importan 2 pertschient dals custs d'investiziun.

La finanziaziun concluda il Cussegl grond mintgamai sur credits d'impegn generals da plirs onns. Per ils emprests è previs – per ils emprims 10 onns – in credit da 15 milliuns francs en il senn d'in fond da rotaziun chantunal. Per las contribuziuns à fonds perdu duai star a disposiziun in credit da 4 milliuns francs.

Agiuntas:

Missiva davart la promoziun d'abitaziuns en il Grischun

Infurmaziuns:

President da la Regenza Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel da las 13.00 fin las 14.00), e‑mail Marcus.Caduff@dvs.gr.ch