Il Departament da giustia, segirezza e sanadad (DGSS) e l'Uffizi per l'execuziun giudiziala (UEG) avevan surdà la stad 2024 l'incumbensa da far in'analisa externa cun il titel «UEG 2025+». La necessitad era resultada suenter il grond augment dal dumber da collavuraturas e collavuraturs pervia da l'avertura dal nov Stabiliment giudizial Cazas Tignez e pervia dals pensiunaments da persunas decisivas en l'uffizi l'onn 2026. En l'analisa èn vegnids examinads criticamain ils process e las structuras dal UEG. Las recumandaziuns èn ussa avant maun.

Actualmain collocheschan 16 chantuns praschuniers en il Stabiliment giudizial Realta ed en il Stabiliment giudizial Cazas Tignez. Cun passa 45 000 dis d'alimentaziun per onn cumpiglia l'occupaziun dals dus stabiliments giudizials bundant 85 pertschient. Tecnica da segirezza la pli nova, programs da furmaziun, pussaivladads da lavurar e mesiras terapeuticas sustegnan ils praschuniers, als qualifitgeschan da surpigliar atgna responsabladad ed als preparan per ina reintegraziun en la societad. En lur mintgadi professiunal pretensius procuran las collavuraturas ed ils collavuraturs, che l'equiliber tranter segirezza, urden e resocialisaziun reusseschia.

L'analisa vegn pia a la conclusiun, che las finamiras da segirezza e d'execuziun, la protecziun da las collavuraturas e dals collavuraturs sco er dals praschuniers, l'orientaziun a las ristgas ed a la resocialisaziun vegnian cuntanschidas en il Stabiliment giudizial Cazas Tignez sco er en il Stabiliment giudizial Realta. L'execuziun giudiziala en il Grischun vegn ademplida en ina moda ordinada che sa referescha a l'incumbensa, e realisada tenor las leschas e tenor las cundiziuns generalas existentas.

Il basegn d'agir è identifitgà
L'analisa externa ha examinà cun egl critic las structuras d'organisaziun e da process da l'uffizi. Suenter in'enquista qualitativa tar las collavuraturas ed ils collavuraturs, tar las persunas directivas e tar ils partenaris externs da l'uffizi, èn vegnidas formuladas differentas recumandaziuns.

Uschia sa mussa in basegn d'agir en ils secturs svilup digital, cultura d'organisaziun e direcziun sco er svilup dal persunal e communicaziun. Tranter il Stabiliment giudizial Realta ed il Stabiliment giudizial Cazas Tignez vesa l'analisa plinavant in potenzial da trair a niz sinergias. Ultra da quai duai vegnir revedida la strategia da l'onn 2013 per l'orientaziun futura da l'execuziun giudiziala.

Svilup dal persunal e digitalisaziun
Cunzunt tranter ils dus stabiliments giudizials duai il UEG promover la collavuraziun cun tut las gruppas professiunalas, cun tut ils stgalims e cun tut las partiziuns. Ultra da quai vegni recumandà da sviluppar ina chapientscha directiva cuminaivla. Concernent il svilup digital èn dumandadas resursas supplementaras a favur dal transfer d'enconuschientschas tranter las collavuraturas ed ils collavuraturs. Il UEG è gia entamez il process da transfurmaziun digitala. En vista a las pretensiuns da segirezza en l'execuziun giudiziala è quest process pretensius per las collavuraturas ed ils collavuraturs sco er per il cader. Pervia da la mancanza da persunas spezialisadas e da forzas da lavur, pervia da las exigenzas da la furmaziun per las collavuraturas ed ils collavuraturs da l'execuziun giudiziala e pervia da las prescripziuns da segirezza rigurusas per las collavuraturas ed ils collavuraturs, èn ils fatgs da persunal medemamain confruntads cun grondas sfidas.

Sco emprima mesira è gia vegnida realisada la recumandaziun d'engrondir la partiziun da persunal (HR), quai per pudair en il futur accumpagnar meglier il svilup dal persunal en ils stabiliments.

Strategia e communicaziun
L'onn 2026 duai plinavant vegnir lantschà in process strategic. Quai per sondar ils potenzials futurs da svilup e da sinergias sco er per posiziunar ils stabiliments giudizials grischuns entaifer il Concordat da la Svizra orientala davart l'execuziun da chastis. Gia en elavuraziun è in concept da communicaziun cumplessiv che gida a rinforzar la communicaziun interna ed externa.

Nova occupaziun da la direcziun da l'uffizi
Il manader actual da l'uffizi Mathias Fässler va en pensiun la primavaira 2026. Sia plazza vegn a vegnir publitgada las proximas emnas. Il cusseglier guvernativ Peter Peyer, il schef dal Departament da giustia, segirezza e sanadad, ha decidì da sviluppar la strategia e da realisar in'eventuala reorganisaziun, per exempel da reducir a mo ina direcziun per ils dus stabiliments, pir suenter avair tschernì la nova direcziun da l'uffizi.

«Igl è zunt legraivel, che nus en l'execuziun giudiziala pudain quintar cun in cader motivà sco er cun collavuraturas e collavuraturs engaschads. Dad els stuain nus avair quità», di il cusseglier guvernativ Peter Peyer. «L'execuziun giudiziala porscha plazzas da lavur pretensiusas che dattan in senn. Nus constatain, che l'installaziun dal nov Stabiliment giudizial Cazas Tignez è terminada cun success. Ussa vali da concepir ils manaschis da l'execuziun giudiziala en ina moda e maniera solida per l'avegnir».

Var 200 collavuraturas e collavuraturs en l'execuziun giudiziala
Il Stabiliment giudizial Cazas Tignez ha pudì vegnir retratg avant 5 onns, curt avant l'erupziun da la pandemia dal coronavirus, quai sco remplazzament da l'anteriura praschun Sennhof a Cuira. Il dumber dal persunal per l'execuziun serrada è vegnì quadruplà. Actualmain assistan las collavuraturas ed ils collavuraturs dal Stabiliment giudizial Cazas Tignez trais giadas uschè blers praschuniers sco anc durant il temp dal Sennhof. En tut lavuran var 200 persunas en il UEG.

Parallelamain a l'avertura dal Stabiliment giudizial Cazas Tignez èn vegnids lantschads e realisads durant ils ultims onns numerus projects en il UEG. Uschia per exempel novs edifizis sin il bain puril, la partiziun transitorica serrada en il Stabiliment giudizial Realta sco er il remplazzament da numerus sistems dad IT. En il rom dal plan d'acziun egual21 prepara il UEG – en collavuraziun cun il Center UND – actualmain in project da pilot davart il tema cumpatibilitad da la professiun cun la vita privata sco er davart il tema egualitad.

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 14.00 fin las 16.00), e‑mail Peter.Peyer@djsg.gr.ch

Responsabladad: Departament da giustia, segirezza e sanadad