L'avrigl 2025 vegn realisada entaifer l'administraziun la midada a la nova applicaziun per la taxaziun da la perioda fiscala 2024 tar las persunas natiralas. La nova applicaziun vegn ad augmentar l'effizienza entaifer l'administraziun da taglia en las periodas consecutivas. Per las persunas obligadas da pajar taglia n'ha quai naginas consequenzas per il process d'emplenir la decleraziun da taglia. En general ston ellas dentant spetgar pli ditg sin lur disposiziun da taxaziun definitiva 2024.

La transfurmaziun digitala va en la fasa decisiva. Suenter ch'il nov register da taglia è vegnì mess en funcziun il cumenzament da l'onn 2024, vegn introducida mez avrigl 2025 la nova applicaziun da taxaziun per persunas natiralas. L'applicaziun veglia resta en funcziun, fin che las lavurs en connex cun las periodas fiscalas pli veglias èn terminadas. Dal 1. fin e cun ils 14 d'avrigl 2025 vegn scolà l'entir persunal pertutgà, per che la taxaziun da la perioda fiscala 2024 possia suenter vegnir fatga directamain cun la nova applicaziun. Cun quest pass sa prepara l'Administraziun da taglia per l'avegnir.

La nova applicaziun augmenta l'effizienza, la transparenza e la suandabladad per las persunas obligadas da pajar taglia. Cun la nova applicaziun pon plinavant vegnir resguardadas meglier las furmas da viver odiernas. Las applicaziuns per la decleraziun da taglia n'èn betg pertutgadas da questa midada. Per las persunas obligadas da pajar taglia n'ha la midada interna uschia naginas consequenzas per il process d'emplenir la decleraziun da taglia.

Fasa da midada pretensiusa
Durant e directamain suenter la midada stoi vegnir fatg quint vinavant cun rectificaziuns tecnicas sco er cun lavur supplementara pervia da l'integraziun en ils sistems circumdants existents. Lavur supplementara resulta er da la taxaziun parallela cun l'applicaziun nova e veglia. Cumpareglià cun ils onns precedents vegn la midada a chaschunar in retardament general da la taxaziun da la perioda fiscala 2024. Pertutgads concretamain èn l'Administraziun chantunala da taglia ed ils uffizis communals da taglia, respectivamain las allianzas da taglia. Tut quests posts sa stentan d'elavurar las decleraziuns da taglia inoltradas entaifer uschè curt temp sco pussaivel. L'onn proxim duai puspè esser pussaivel il ritmus da temp usità.

Infurmaziuns:

Angelo Roberto, manader da l'Administraziun chantunala da taglia, tel. +41 81 257 34 44 (cuntanschibel da las 8.30 fin las 11.30), e‑mail Angelo.Roberto@stv.gr.ch