Dependenza e violenza a chasa cumparan savens cuminaivlamain e chaschunan sfidas particularas per ils posts spezialisads. Per rinforzar la collavuraziun tranter la lavur che s'occupa da violenza, da victimas e da dependenza envida l'Uffizi chantunal dal servetsch social ad in inscunter da barat. Contribuziuns spezialisadas e discussiuns duain gidar ad approfundar enconuschientschas specificas ed a sviluppar propostas da soluziun cuminaivlas.

La violenza a chasa e la dependenza – en spezial la dependenza d'alcohol – han savens in connex stretg e cumplex. Il consum d'alcohol po augmentar la prontezza da duvrar violenza, entant che la violenza po da sia vart esser il motiv ch'i vegn consumà dapli alcohol. Er l'esser exponì a violenza a chasa po influenzar il consum d'alcohol u d'autras substanzas. Tuts dus temas èn tabuisads en la societad. Quai engrevgescha il sustegn da las persunas pertutgadas.

Rinforzar la collavuraziun
Purschidas spezialisadas per persunas ch'èn pertutgadas tant da dependenza sco er da violenza a chasa na datti strusch. Tant pli impurtant èsi, che las persunas spezialisadas da la lavur che s'occupa da violenza, da victimas e da dependenza sajan conscientas da la problematica duala, ch'ellas enconuschian las purschidas existentas e collavurian stretgamain ina cun l'autra.

Il Post da coordinaziun Politica da dependenza / agid per persunas dependentas ed il Post da coordinaziun Violenza a chasa da l'Uffizi chantunal dal servetsch social envidan, a chaschun dal Di d'acziun naziunal davart ils problems d'alcohol, ad in inscunter da barat chantunal. Contribuziuns spezialisadas da l'agid a victimas sco er da la cussegliaziun en dumondas da dependenza e da violenza porschan spazi per barattar savida, per discutar e per connectar. La finamira è quella da parter las enconuschientschas spezialisadas, da sviluppar propostas da soluziuns cuminaivlas e da rinforzar la collavuraziun interdisciplinara dals posts spezialisads participads en connex cun la problematica duala.

L'inscunter da barat ha lieu gievgia, ils 22 da matg 2025, a Cuira e sa drizza a persunas spezialisadas interessadas.

Infurmaziuns:

Madlaina Baselgia, manadra dal Post da coordinaziun Violenza a chasa, Uffizi dal servetsch social dal Grischun, tel. +41 81 257 26 11, e‑mail Madlaina.Baselgia@soa.gr.ch