Cun ina erupziun fictiva d'ina epidemia d'animals regiunala ha il chantun Grischun controllà, quant bain ch'ils scenaris da crisa funcziunan. Per quest intent han l'Uffizi per la segirezza da victualias e per la sanadad d'animals (USVA) e l'Uffizi da militar e da protecziun civila (UMPC) simulà dals 31 da mars fin ils 4 d'avrigl 2025 en la regiun Moesa in'erupziun da la pesta da portgs africana tar ils portgs selvadis.

L'exercizi d'ina epidemia a Grono ha gì sco finamira d'examinar las resursas materialas e persunalas, da dumagnar las sfidas logisticas particularas en in lieu perifer, d'exercitar la collavuraziun cun ils differents partenaris sco er da minimar ils donns pussaivels tras in agir correct.

L'exercizi d'ina epidemia ha gì success e tut las persunas participadas han dumagnà bain lur incumbensas. L'interacziun tranter las autoritads, la protecziun civila, las gruppas cun chauns, ils pilots da dronas, las voluntarias ed ils voluntaris privats e la firma da dismessa è stada svelta ed effizienta. Las enconuschientschas ch'ins ha obtegnì da l'exercizi èn fitg utilas ed impurtantas per intervenziuns futuras.

Ultra da quai han ins pudì sensibilisar cun quest exercizi per il tema pesta da portgs africana (PPA) – e quai en la regiun che fiss probablamain pertutgada sco emprima en il chantun Grischun da l'erupziun d'ina tala epidemia.

Las consequenzas d'ina erupziun
La pesta da portgs africana è ina malsogna virala infectusa che pertutga ils portgs selvadis ed ils portgs domestics e che n'è betg privlusa per ils umans. 95 pertschient dals animals che han questa malsogna moran entaifer paucs dis. Il virus po vegnir transmess tras il contact direct cun in animal infectà, tras il contact cun charn-portg che cuntegna il virus (p.ex. rests da salami che vegnan bittads en il guaud suenter in picnic) u tras objects contaminads (vestgadira, chalzers, vehichels, e.u.v.). In'ulteriura funtauna d'infecziun per ils portgs selvadis è il contact d'individis sauns cun cadavers u secrets da portgs selvadis infectads (excrements, urin, sang, e.u.v.).

In'erupziun da questa malsogna ha tant consequenzas relevantas per la protecziun dals animals (els pateschan fermamain avant che murir ), sco er per l'economia. En ils territoris pertutgads valan scumonds d'exportar charn-portg, scumonds da chatscha sco er restricziuns per entrar en il guaud e per l'agricultura.

Temp da reacziun e rutina sco clav da success
Sch'ina epidemia d'animals fitg contagiusa vegn scuverta baud, pon ins prender pli sistematicamain mesiras per minimar u schizunt evitar ina derasaziun. L'observaziun tras persunas privatas ed il cumportament correct da las organisaziuns partenarias èn decisivs en il cas d'urgenza. Per esser preparads per il cas d'urgenza organiseschan l'Uffizi per la segirezza da victualias e per la sanadad d'animals (USVA) e l'Uffizi da militar e da protecziun civila (UMPC) perquai exercizis.

Collavuraziun sco pitga per cumbatter epidemias d'animals
Las veterinarias ed ils veterinaris uffizials dal USVA èn scolads per sclerir epidemias d'animals fitg contagiusas ed equipads cun il material necessari. Els examineschan ils animals e prendan provas da labor per confermar la diagnosa. Sche animals da niz èn pertutgads, erueschan ellas ed els ils moviments dals animals ed ordineschan mesiras da bloccada per la tratga d'animals pertutgada.

Las spezialistas ed ils spezialists ABC per il cumbat cunter epidemias da las organisaziuns da protecziun civila dal Grischun e da la Glaruna realiseschan las mesiras al lieu, surveglian quellas e sustegnan il USVA tar mintga element dal cumbat entaifer il territori bloccà. La grevezza fisica e psichica d'ina tala acziun è fitg gronda per las spezialistas ed ils spezialists ABC per il cumbat cunter epidemias.

Infurmaziuns spezialas davart la pesta da portgs africana chattais Vus sin la pagina d'internet dal USVA.

Fotografia agiuntada:

Foto 2, Foto 3, Foto 4, Foto 5

Infurmaziuns:

Giochen Bearth, manader da l'uffizi e veterinari chantunal, Uffizi per la segirezza da victualias e per la sanadad d'animals, tel. +41 81 257 24 11 (cuntanschibel da las 10.00 fin las 12.00), e‑mail Giochen.Bearth@alt.gr.ch