Bainbaud cumenza la stagiun da construcziun 2025: Sin la rait da vias chantunalas d'ina lunghezza da stgars 1360 kilometers ha l'Uffizi da construcziun bassa dal Grischun planisà tut en tut 157 plazzals. Sin 70 da quests plazzals vegnan endrizzadas amplas da traffic.

Cun 157 plazzals planisescha l'Uffizi da construcziun bassa dal Grischun (UCB) quest onn circa tuttina blers plazzals sco durant la stagiun da construcziun passada dal 2024. Entant ch'i èn vegnidas duvradas l'onn passà amplas da traffic tar circa 61 pertschient dals plazzals, è quai il cas durant questa stagiun mo tar var 44 pertschient. Questa reducziun suttastritga il fatg ch'il focus vegn mess pli fitg sin regulaziuns dal traffic optimadas e sin andaments da lavur effizients.

Fegl d'infurmaziun dal UCB: Detagls davart singuls projects
Quest onn vegni construì tranter auter sin la via d'Engiadina a Zuoz, nua ch'il UCB realisescha ina rundella per augmentar la segirezza dal traffic. Er sin la via dal Lucmagn han lieu lavurs da construcziun: Sin il traject Stgegia vegn il vial schlargià a 6 meters. Infurmaziuns detagliadas davart quests ed ulteriurs projects da vias ch'il UCB cumenza las proximas emnas, èn cuntegnidas en la pli nova Info dal UCB. Ultra da quai datti infurmaziuns detagliadas, co ch'il UCB optimescha duraivlamain la circulaziun dal traffic tar las amplas da traffic cun duvrar sistematicamain marcaziuns da fermada e nua che las participantas ed ils participants dal traffic dastgan puspè sa legrar sin via libra suenter la fin da questa stagiun da construcziun.

Cumportament correct en il sectur dals plazzals
L'emprima prioritad en connex cun tut quests projects ha la segirezza da las lavurantas e dals lavurants sin ils plazzals. En quest connex èsi cunzunt impurtant, che las participantas ed ils participants dal traffic prendian il resguard necessari. Davos las barricadas lavuran umans, cun la finamira da meglierar l'infrastructura per tuts. Sche las participantas ed ils participants dal traffic sa cuntegnan cun respect, pussibiliteschan ellas ed els a questas persunas da lavurar en moda segira. Per traversar il sectur dal plazzal supplitgescha il UCB perquai las participantas ed ils participants dal traffic d'adattar la sveltezza, d'augmentar l'attenziun, da tegnair ina distanza suffizienta da las barricadas e d'observar en mintga cas las amplas da traffic sco er las ordinaziuns dal persunal dal plazzal e dal servetsch da traffic.

Actualisaziun permanenta sin strassen.gr.ch
Infurmaziuns actualas davart las restricziuns en connex cun plazzals e davart las lavurs vegnan publitgadas cuntinuadamain sin la pagina d'internet strassen.gr.ch e stattan a disposiziun sco charta interactiva u sco glista da PDF.

Fotografias agiuntadas:

Fotografia 1: Maletg simbolic: Ina marcaziun da fermada duai meglierar la circulaziun dal traffic tar amplas da traffic mobilas.

Fotografia 2: Access Zuoz: Qua vegn construida ina rundella.

Agiunta:

Info dal UCB dals 8 d'avrigl 2025

Infurmaziuns:

Roger Stäubli, schef Construcziun da vias / substitut da l'inschigner chantunal, Uffizi da construcziun bassa, tel. +41 81 257 38 42 (cuntanschibel da las 08.00 fin las 09.30), e‑mail Roger.Staeubli@tba.gr.ch