Sin fundament dal Program da la Regenza 2021–2024 ha l'Uffizi da sanadad dal Grischun elavurà mesiras per distgargiar ed indemnisar las persunas che tgiran ed assistan lur confamigliars e publitgà questas mesiras en in plan d'acziun. En connex cun la distgargia finanziala da las persunas che porschan assistenza prevesa il plan d'acziun d'introducir en l'entir chantun contribuziuns d'assistenza mensilas. Questa contribuziun d'assistenza mensila duai importar 300 fin 600 francs. Sa referind als chantuns Glaruna e Vad vegn la Regenza previsiblamain a fixar in import da 500 francs. Sin fundament da las presumziuns da l'Uffizi da sanadad dastgassan las expensas uschia importar maximalmain 2,4 milliuns francs per onn.
Cun introducir quests imports pon vegnir impedidas u almain retardadas collocaziuns en chasas da tgira, quai confurm al princip da la politica da sanadad «ambulant avant staziunar». Las contribuziuns d'assistenza duain cumplettar las pretensiuns dal dretg d'assicuranza sociala existentas sin plaun federal.
Questa revisiun parziala ha l'intent da reglar las modalitads en connex cun ils pajaments da las contribuziuns d'assistenza mensilas. Il chantun propona d'integrar tut en tut tschintg novas disposiziuns en la Lescha per promover la tgira da persunas malsaunas e l'assistenza da persunas attempadas e da persunas che basegnan tgira. Ils artitgels da lescha reglan la cumpetenza e l'autezza da las contribuziuns, las premissas per survegnir contribuziuns, la dumonda e la decisiun, il cumenzament e la durada dal dretg da contribuziuns sco er l'obligaziun da cooperaziun, l'obligaziun d'annunzia e la restituziun.
Igl è planisà da metter en vigur la revisiun parziala per il 1. da schaner 2027. Quest temp dovri per realisar tecnicamain las midadas.


Cumenzament: 28 d'avust 2024
Fin: 28 da november 2024