L'onn 2023 han 2187 Grischunas e Grischuns retratg almain ina giada agid social economic. Quai èn 141 persunas damain che l'onn 2022. La quota d'agid social sa sbassa cun quai ad 1,1 pertschient ed è vinavant sut la media naziunala da 2,8 pertschient.
Sche persunas en Svizra vegnan en difficultads finanzialas, pon ellas dumandar agid social. Quest agid procura ch'ellas hajan il pli necessari per viver, sche lur agen salari ed auters agids finanzials na bastan betg u na vegnan betg pajads ad uras. L'onn 2023 han 2187 persunas en il chantun Grischun survegnì agid social. Quai èn 1,1 pertschient da tut la populaziun dal chantun u ditg cun auters pleds: 11 da 1000 persunas en il chantun Grischun han retratg agid social.
Per la segunda giada en fila è il dumber da las persunas che survegnan agid social sa reducì, ed uschia er la quota d'agid social. Quella è sa reducida per 0,1 puncts procentuals. En tut la Svizra è questa quota ina da las pli bassas. En Svizra è la quota d'agid social stada tar 2,8 pertschient l'onn 2023. Er questa quota è sa reducida per 0,1 puncts procentuals, cumpareglià cun l'onn precedent.
Grafica 1: Quota d'agid social en il chantun Grischun ed en Svizra, 2010 fin 2023
Paucas novas entradas e reducziun dals dossiers en l'agid social
In motiv per la diminuziun da las retschavidras e dals retschaviders d'agid social è la buna situaziun sin il martgà da lavur. La quota da dischoccupaziun è restada bassa er l'onn 2023. En il Grischun ha ella importà 1 pertschient (en Svizra 2 pertschient, cf. media annuala dal SECO 2023). Quai ha consequenzas per il dumber dals novs dossiers ch'èn vegnids averts. Quest dumber è bain creschì levamain da 447 a 474, el sa chatta però anc adina sut la media dals ultims 8 onns (530 dossiers). Pervia dals paucs dossiers novs dals ultims onns è il dumber total dals dossiers sa reducì cuntinuadamain.
Grafica 2: Total dals dossiers e dossiers novs e serrads, 2016 fin 2023
Augment dal dumber da las asilantas e dals asilants che han retratg agid social
L'onn 2015 è il dumber da las dumondas d'asil s'augmentà fermamain en Svizra pervia dals conflicts cuntinuants en la Siria, en l'Afganistan ed en l'Irac. Cun in retard è quest augment sa mussà er en l'agid social. La quota da las asilantas e dals asilants che retiran agid social è creschida cuntinuadamain ils ultims onns. Er l'onn 2023 è la quota anc ina giada creschida da 24,0 pertschient a 25,3 pertschient.
La Confederaziun sa participescha als custs da l'agid social da las vischnancas e dals chantuns. Ella fa quai per fugitivas e fugitivs cun asil ils emprims 5 onns a partir da l'inoltraziun da la dumonda d'asil sco er per fugitivas e fugitivs admess provisoricamain e per persunas admessas provisoricamain durant 7 onns a partir da l'entrada en Svizra. Durant quest temp cumparan las persunas en la statistica d'asil e da fugitivs. Suenter midan las persunas en la cumpetenza finanziala dal chantun e da las vischnancas e cumparan en la statistica da l'agid social economic.
Grafica 3: Quota da las asilantas e dals asilants che han retratg agid social en relaziun cun il total da las persunas che han retratg agid social en il chantun Grischun, 2016–2023
En vista a quest svilup sa tschenta tar persunas dal sectur d'asil la dumonda dals process a pli lunga vista per sa deliberar da l'agid social. Studis longitudinals mussan, che 92,4 pertschient da las requirentas e dals requirents d'asil ch'èn entrads en Svizra l'onn 2016 e ch'èn vegnids attribuids al chantun Grischun, han retratg agid social 1 onn suenter l'entrada en Svizra. 7 onns pli tard, l'onn 2023, retiran cun 39,5 pertschient cleramain main persunas da questa gruppa agid social. En Svizra èn restads en l'agid social 56,8 pertschient da las requirentas e dals requirents d'asil ch'èn arrivads l'onn 2016. Cumpareglià cun l'entira Svizra èn pia dapli persunas da questa gruppa sa deliberadas da l'agid social en il chantun Grischun.
Sch'ins considerescha en la medema gruppa da persunas (er numnada cohorta) mo las persunas che retiran agid social e ch'èn en la vegliadetgna da lavur (da 15 fin 64 onns), ves'ins, che la quota da las persunas cun ina activitad da gudogn è s'augmentada en il decurs dals onns. L'onn 2016 importava ella 5,3 pertschient e 7 onns pli tard, l'onn 2023, era ella tar la medema gruppa tar 46,7 pertschient. Tras l'activitad da gudogn pon las persunas sezzas cuvrir ina part dals custs da viver. Per sa deliberar cumplettamain da l'agid social na bastan las entradas anc betg.
Grafica 3.1: Cumpart da las asilantas e dals asilants cun activitad da gudogn en l'agid social da la cohorta da l'onn 2016
Gruppas socialas ch'èn periclitadas il pli fitg da depender da l'agid social
Las gruppas en la societad, che dovran il pli savens agid social, na sa midan strusch. Primo èn ils uffants ed ils giuvenils pertutgads bler pli savens da l'agid social che las persunas creschidas. En la gruppa da vegliadetgna da 0 fin 17 onns importa la ristga 2,3 pertschient. Quai vul dir che uffants e giuvenils èn dependents pli che duas giadas pli savens da l'agid social che la media en il chantun. Chasadas da famiglias dovran pia pli savens sustegn che chasadas senza uffants.
Grafica 4: Quota d'agid social tenor categoria da vegliadetgna en il chantun Grischun, 2023
Quai vala en spezial per famiglias d'in genitur cun uffants. Ellas èn la segunda gruppa spezialmain periclitada. La quota da las chasadas che retiran agid social importa en il chantun 1,2 pertschient. Tar las chasadas d'in genitur è la quota cun 11,5 pertschient quasi diesch giadas pli gronda.
La terza gruppa èn las persunas senza furmaziun professiunala. Er ellas èn surproporziunalmain savens dependentas da l'agid social. En il chantun Grischun n'han 14,1 pertschient da la populaziun da 25 fin 64 onns nagina furmaziun professiunala. Tar las persunas che retiran agid social importa questa quota 46,5 pertschient. Quai vul dir ch'ina scolaziun diminuescha signifitgantamain la ristga da depender da l'agid social.
Infurmaziuns:
- Susanna Gadient, manadra da l'Uffizi dal servetsch social, tel. +41 81 257 26 51 (cuntanschibla da las 10.00 fin las 11.30), e‑mail Susanna.Gadient@soa.gr.ch
- Mathias Kaufmann, manader dal sectur spezial Servetschs socials / vicemanader da l'uffizi, tel. +41 81 257 26 68 (cuntanschibel da las 10.00 fin las 11.30), e‑mail Mathias.Kaufmann@soa.gr.ch
- Silvia Würmli, Post spezialisà per la statistica d'agid social Turitg e Svizra orientala, tel. +41 43 259 75 54 (cuntanschibla da las 10.00 fin las 11.30), e‑mail Silvia.Wuermli@statistik.ji.zh.ch
Responsabladad: Uffizi dal servetsch social
La Statistica svizra da persunas che survegnan agid social SAS
La Statistica svizra da persunas che survegnan agid social è ina retschertga da datas annuala che vegn realisada da l'Uffizi federal da statistica UST. La finamira da la statistica è quella, da registrar il dumber e la structura da las persunas che retiran en Svizra agid social economic sco er prestaziuns socialas precedentas che dependan d'in basegn. La statistica sa basa sin la collavuraziun cuminaivla da la Confederaziun, dals chantuns e da las vischnancas.
Las basas da la Statistica da persunas che survegnan agid social èn vegnidas sviluppadas avant passa 20 onns. En il rom d'in project da modernisaziun vegnan ellas ussa adattadas a las relaziuns actualas ed als basegns che sa midan. La modernisaziun da la SAS ha las finamiras da reducir la lavur per ils posts da retschertga, da rinforzar l'analisa sco er da scursanir il temp tranter la retschertga e la publicaziun.
Suenter che la realisaziun è vegnida terminada per la fin da l'onn 2024, ha la fasa d'implementaziun cumenzà il schaner 2025. Sin il fundament dal nov catalog da variablas pon las datas ussa vegnir transferidas mintga mais al UST. Fin il november 2025 vegnan tut ils servetschs ad esser colliads cun la furniziun da datas modernisada. Ils emprims resultats da la statistica modernisada vegnan previsiblamain publitgads l'emprim mez onn dal 2026. Indicaziuns pli detagliadas davart il project da modernisaziun e davart la realisaziun chattais Vus tar il Uffizi federal da statistica.