Transport e distribuziun d'electricitad

Il provediment dal chantun cun energia electrica ha lieu sur set nivels da tensiun. Il nivel da rait 1 serva al transport d'energia lunsch enturn, internaziunal e naziunal sco er a l'inducziun en la rait da l'energia idraulica producida en il Grischun. Il nivel da rait 3 surpiglia il transport d'energia per colliar las vals sur distanzas mesaunas. Il nivel da rait 5 serva al provediment da las regiuns ed il nivel da rait 7 surpiglia la distribuziun precisa fin a l'attatg da las singulas chasas e dals singuls edifizis. Ils nivels 2, 4 e 6 garanteschan la transfurmaziun tranter ils differents nivels da tensiun e furman uschia in sistem da rait coerent per in provediment d'energia segir.

Territoris da provediment

La Lescha federala davart il provediment d'electricitad (LPrEl) oblighescha ils chantuns da designar ils territoris da provediment da las gestiunarias da raits ch'èn activas sin lur territori. En il chantun Grischun è la repartiziun dals territoris da provediment chaussa dal chantun e vegn exequida da la Regenza (LPrEl GR).

Cun la designaziun e cun la repartiziun dals territoris da provediment sto vegnir garantì en spezial il provediment d'electricitad en tut las parts dal pajais, uschia ch'ins po impedir ch'i resultian territoris senza provediment. Las gestiunarias da las raits èn obligadas da colliar cun la rait d'electricitad sin lur territori da provediment tut las consumentas finalas e tut ils consuments finals entaifer la zona da construcziun, tut las immobiglias e tut ils abitadis ordaifer la zona da construcziun ch'èn abitads l'entir onn sco er tut las producentas d'electricitad. Questa disposiziun oblighescha las gestiunarias da las raits da furnir electricitad, ma na conceda ad ellas nagina posiziun da monopol.