En vista a l'augment dal traffic vegn pli e pli impurtanta la dumonda d'utilisar en moda pli effizienta l'infrastructura ed ils meds da transport existents, quai cun ina meglra occupaziun. Ina rolla centrala per in sistem da traffic pli effizient gioga la circulaziun da datas tranter ils gestiunaris da l'infrastructura, las interpresas da transport publicas ed ils offerents privats da servetschs da mobilitad sco er la clientella: Mo, sch'i èn avant maun a temp e da buna qualitad infurmaziuns davart il stadi e la disponibladad da l'infrastructura e da la capacitad da transport, po l'entir sistem da traffic vegnir gestiunà en moda effizienta e persistenta. Cumplementarmain als binaris ed a la via ston las datas perquai vegnir consideradas sco terza infrastructura relevanta, per ch'il sistem da mobilitad funcziunia.

Cun la Lescha federala davart l'infrastructura da datas davart la mobilitad duai vegnir stgaffida la basa legala, per che la Confederaziun possia metter a disposiziun l'infrastructura da datas necessaria a favur d'in sistem da mobilitad pli effizient en Svizra. Quai cun l'intent d'utilisar optimalmain las datas davart mobilitad e da colliar las purschidas da mobilitad. Questa infrastructura da las datas davart mobilitad (MODI) cuntegna sco elements principals en in emprim pass d'ina vart la rait da traffic CH e da l'autra vart l'infrastructura naziunala per crear raits da datas davart la mobilitad NADIM. La rait da traffic CH duai preschentar en moda unitara e digitala l'entira rait da traffic da la Svizra e servir sco sistem da referenza local. E NADIM duai facilitar il barat da las datas davart la mobilitad e la colliaziun da las purschidas da mobilitad. En cas da basegn duain ulteriurs elements pudair vegnir cumplettads en moda flexibla. La MODI presta uschia ina contribuziun per pudair gestiunar ed utilisar pli effizientamain las infrastructuras, per planisar sistematicamain ed occupar meglier las purschidas da mobilitad e per satisfar er en l'avegnir optimalmain ed en moda persistenta ils basegns da mobilitad da la populaziun. (Funtauna: documents da consultaziun tar la Lescha federala davart l'infrastructura da las datas davart la mobilitad)

Ulteriuras infurmaziuns: Bundesamt für Verkehr (BAV) Daten für ein effizientes Mobilitätssystem (mo per tudestg)

L'Uffizi d'energia e da traffic represchenta ils chantuns en il cussegl transitoric NADIM.