Per sonda, ils 25 da matg 2013, ha l'uffizi da vischnancas envidà ad ina dieta en l'arena da Cazas; ad ina dieta, a la quala èn sa participads passa 200 represchentantas e represchentants da las autoritads da circa 100 vischnancas. La cussegliera guvernativa Barbara Janom Steiner ha profità da l'occasiun per infurmar las vischnancas d'emprim maun davart las fatschentas ch'èn en curs en ses departament. Ultra da quai ha gì lieu ina discussiun al podium interessanta cun presidentas e presidents da vischnancas fusiunadas.

Passa 200 persunas èn sa scuntradas a l'arena da Cazas ed èn sa laschadas infurmar davart ils temas relevants dal departament da finanzas e vischnancas (DFV). En ses pled da bainvegni è la cussegliera guvernativa Barbara Janom Steiner sa legrada davart il grond interess per ina tala dieta che correspunda evidentamain ad in dretg basegn. Ella ha manifestà ses respect envers il comité d'iniziativa "Fermas vischnancas – in ferm chantun" perquai che tal ha retratg l'iniziativa. "La retratga mussa il senn da responsabladad e cumprova en spezial er la confidenza envers las vischnancas che han adattà or d'atgna iniziativa lur structuras a las sfidas dal temp u che vegnan anc a far quai", uschia la cussegliera guvernativa. La regenza vegnia a far tut il pussaivel er vinavant per cuntanscher las finamiras ch'il cussegl grond ha concludì durant la sessiun da favrer 2011. Plinavant infurmescha la scheffa dal DFV davart ils emprims resultats da la consultaziun tar la lescha dal persunal, davart las midadas da la lescha davart la cassa da pensiun sco er davart la refurma da las vischnancas e dal territori.

Ils resultats da la consultaziun tar la refurma da la gulivaziun da finanzas (refurma da la GF) furman in accent spezial da la dieta. Il departament ha tradì tge aspect ch'ils ulteriurs pass da quest project da refurma cumplessiv vegnan ad avair. Janom Steiner ha infurmà davart ils motivs che han chaschunà in'adattaziun da l'urari per la refurma da la GF. Schebain che la concepziun da basa dal project chatta in vast sustegn, èn tuttina vegnidas giavischadas correcturas da parts essenzialas dal project. Per avair temp avunda per examinar cun quità quests giavischs ha la regenza l'intenziun da suttametter al cussegl grond la missiva durant la sessiun da december 2013 (empè da durant la sessiun d'october) per la debatta. La regenza vegn probablamain a decider il zercladur 2013 davart las correcturas proponidas. Il secretari da finanzas Urs Brasser è s'approfundà en sias decleraziuns en las adattaziuns previsas da la refurma da la GF.

Davart la refurma da las vischnancas e dal territori sco er davart il stadi en chaussa MAC2 per las vischnancas grischunas ha infurmà Thomas Kollegger, schef da l'uffizi da vischnancas (UV). Ultra da quai ha el pudì preschentar in'ediziun dal tuttafatg nova dal mussavia per las cumissiuns da gestiun (mussavia CdG). 

Experientschas cun fusiuns da vischnancas
In interess spezial ha chattà l'occurrenza al podium cun la presidenta communala da la Bregaglia sco er cun quatter ulteriurs presidents communals. Anna Giacometti, Bregaglia, Arno Lamprecht, Val Müstair, Georg Niggli, Grüsch, Lorenzo Schmid, Arosa, sco er Thomas Buchli, Val Stussavgia, han discurrì davart lur experientschas cun las fusiuns da vischnancas realisadas. Schebain che realisar fusiuns cumpiglia numerusas difficultads, sa paja il pass vers in futur cuminaivel. Uschia pon ins resumar il facit da la discussiun al podium.

Sut il tema "ulteriuras infurmaziuns" ha preschentà tranter auter dunna Alexandra Molinaro "easyvote" ina mesira che duai servir a las vischnancas per promover lur participaziun politica. L'uffizi chantunal per industria, mastergn e lavur dal Grischun ha infurmà davart la purschida dals programs d'engaschament. 


Infurmaziuns:
- cussegliera guvernativa Barbara Janom Steiner, scheffa dal departament da finanzas e vischnancas, e-mail barbara.janom@dfg.gr.ch (cloma enavos)
- Simon Theus, substitut dal manader da l'uffizi da vischnancas / manader "projects", tel. 079 306 71 72, e-mail simon.theus@afg.gr.ch  
 

Gremi: departament da finanzas e vischnancas
Funtauna: rg departament da finanzas e vischnancas