La cumissiun dal cussegl grond per economia e taxas ha predeliberà la missiva da la regenza tar l'iniziativa chantunala dal pievel "Main taglia per il mastergn". Ella sustegna las propostas da la regenza e refusa uschia l'iniziativa. Medemamain desista la cumissiun d'ina cuntraproposta. Il cussegl grond vegn a tractar questa fatschenta en la sessiun d'october 2013.

L'iniziativa chantunala dal pievel "Main taglia per il mastergn" vul che las persunas giuridicas na stoppian betg pli pajar ina taglia da cultus. En sia missiva propona la regenza da refusar l'iniziativa. La cumissiun per economia e taxas ha acceptà unanimamain questa opiniun. Tenor la cumissiun predeliberanta vegniss la gronda maioritad da las persunas giuridicas distgargiada mo marginalmain, per las baselgias chantunalas resultassan percunter perditas finanzialas drasticas. In'aboliziun da la taglia da cultus avess per consequenza che circa in terz da las entradas crudass davent tar la baselgia chantunala evangelica. Tar la baselgia chantunala catolica fiss quai schizunt passa 90 pertschient da las entradas. Ina gronda part da las purschidas da la baselgia che vegnan offridas ordaifer il sectur da cultus na pudess uschia betg pli vegnir finanziada. Qua sa tracti da purschidas e da prestaziuns socialas, caritativas e culturalas che las duas baselgias furneschan a favur da la populaziun grischuna. Per la cumissiun han questas prestaziuns dapli impurtanza che l'interess d'abolir la taglia da cultus. E cuntrari a quai ch'il titel da l'iniziativa lascha parair, na profitass dal rest betg l'entir mastergn da l'aboliziun, mabain mo las persunas giuridicas (societads anonimas, societads cun responsabladad limitada). La maioritad da las mastergnantas e dals mastergnants èn persunas cun activitad da gudogn independenta en furma d'interpresas singulas u d'interpresas da persunas e n'èn pia betg pertutgadas da l'iniziativa. En quest connex crititgescha la cumissiun er ch'il titel tschernì da las iniziantas e dals iniziants e ch'il text da l'iniziativa n'hajan betg la clerezza giavischada. Perquai che la procedura è gia en in stadi avanzà e sin basa dal princip "En cas da dubi per l'iniziativa", ha la cumissiun dentant renunzià da proponer al cussegl grond da declerar l'iniziativa sco nunvalaivla. La cumissiun è dentant da l'avis ch'ins stoppia pretender da las iniziantas e dals iniziants en l'avegnir iniziativas cun in titel e cun in cuntegn pli cler e pli evident.

Plinavant ha la cumissiun pudì sa persvader da desister d'ina cuntraproposta. Alternativas sco ina taglia da mandats, destinaziuns fixas u cunvegnas da prestaziun avessan dischavantatgs considerabels envers il sistem actual, chaschunassan fitg blera lavur e na fissan gnanc realisablas entaifer il termin che l'iniziativa sto vegnir tractada.

Il cussegl grond vegn a tractar l'iniziativa en la sessiun d'october 2013. 
 

Infurmaziuns:
Peter Engler, vicepresident da la cumissiun, tel. 079 468 18 52 
 

Gremi: cumissiun per economia e taxas
Funtauna: rg cumissiun per economia e taxas