Il project da refurma dal turissem ch'è vegnì lantschà l'onn 2006 e che sa cloma "Structuras cumpetitivas e repartiziun da las incumbensas en il turissem grischun" terminescha la fin da l'onn 2013. Sin la fin da la refurma dal turissem ha l'uffizi per economia e turissem dal Grischun publitgà ina broschura d'infurmaziun. Quella tracta la refurma a partir da l'onn 2006 fin l'onn 2013. Ella illustrescha ils aspects centrals dal project cumplessiv e dat ina survista generala da las novas structuras da destinaziun e da las sfidas che ston vegnir schliadas sco er ina perspectiva sin ils onns proxims.

Dapi il cumenzament dal project da refurma "Structuras cumpetitivas e repartiziun da las incumbensas en il turissem grischun" l'onn 2006 èsi capità bler en il turissem grischun. La finamira da la refurma è stada quella d'amplifitgar la cumpetitivitad dal turissem tras novas structuras e tras la repartiziun correspundenta da las incumbensas. Mesiras accumpagnantas han cumplettà il project en blers reguards. En ina broschura d'infurmaziun finala vegni mussà tge che la refurma ha cuntanschì durant ils ultims 8 onns. La broschura dat ina survista davart la furmaziun da las destinaziuns en las singulas valladas dal chantun sco er davart las mesiras accumpagnantas. La broschura cumpiglia 52 paginas e vegn repartida als circuls politics ed economics turisticamain interessads sco er a tut las organisaziuns turisticas en il chantun Grischun. La refurma cumplessiva dal turissem ha pudì vegnir realisada cun success durant ils ultims onns er perquai che tut ils partenaris participads al project han lavurà cuminaivlamain per dumagnar las sfidas. 

Realisà cun success la refurma da las structuras
En connex cun la refurma dal turissem èn vegnidas schliadas en il chantun las structuras ch'eran sa furmadas durant onns ed ins ha chattà novas furmas per collavurar e per repartir las incumbensas. Il turissem grischun è oz bler pli cumpetitiv – e las incumbensas tranter ils singuls acturs èn repartidas en moda bler pli clera. Da las 92 organisaziuns turisticas da quella giada ch'eran per il pli localas èn resultadas 4 organisaziuns per la gestiun da destinaziuns (OGD) e pliras organisaziuns turisticas regiunalas (OTReg). La bilantscha da la refurma da las structuras per il turissem grischun ch'il chantun ha obtegnì ensemen cun tut ils acturs impurtants da la branscha durant ils onns 2006 fin 2013, è positiva: In aut grad da professiunalisaziun è vegnì cuntanschì areguard la direcziun da las destinaziuns, areguard lur commerzialisaziun ed areguard la concepziun da lur purschidas. La nova regulaziun da la finanziaziun dal turissem n'ha betg pudì vegnir realisada, perquai che la lescha chantunala davart il turissem è vegnida refusada a l'urna. Las novas structuras da destinaziun ston pia vegnir finanziadas vinavant cun agid da leschas communalas davart il turissem. Las vischnancas ston ussa chattar atgnas soluziuns per garantir la coordinaziun da las incumbensas e la finanziaziun dal turissem en lur destinaziuns. 

Las premissas per dapli cumpetitivitad èn vegnidas meglieradas
L'universitad da Berna, sco instanza independenta che vegn d'ordaifer, ha analisà la refurma dal turissem grischun ed ha giuditgà il concept, il process ed il resultat. Ultra da quai ha l'universitad da Son Gagl (HSG) examinà ils potenzials internaziunals per il turissem grischun. Ussa hai num da sviluppar vinavant il turissem dal Grischun. Il nov program da cooperaziun en il turissem grischun 2014 – 2021 che vegn tractà dal cussegl grond en la sessiun da december 2013 prevesa in stausch d'innovaziuns (communicaziun a las medias dals 31-10-2013). 

La broschura po vegnir retratga gratuitamain
La broschura sco er auters documents da basa pon vegnir chargiads giu da l'internet sut www.awt.gr.ch, rubrica "Themen/Projekte / Bündner Tourismusreform 2006 – 2013", u vegnir empustads directamain e gratuitamain tar l'uffizi per economia e turissem, Grabenstrasse 1, 7001 Cuira (telefon 081 257 23 42 u e-mail info@awt.gr.ch). 
 

Infurmaziuns:
Eugen Arpagaus, manader da l'uffizi per economia e turissem, tel. 081 257 23 77, telefon mobil 079 256 93 94, e-mail Eugen.Arpagaus@awt.gr.ch  
 

Gremi: uffizi per economia e turissem
Funtauna: rg uffizi per economia e turissem