La regenza grischuna ha nominà Martin Bühler sco nov manader da l'uffizi da militar e da protecziun civila. Martin Bühler è responsabel per la direcziun da l'uffizi cun var 30 collavuraturas e collavuraturs e maina il stab directiv chantunal.

La regenza grischuna ha elegì Martin Bühler sco nov manader da l'uffizi da militar e da protecziun civila. Martin Bühler ha 40 onns ed in diplom sco lic. fil. Actualmain è Bühler commember da la direcziun da la scola auta da pedagogia dal Grischun. Avant ha el lavurà sco manader da project tar las "Relaziuns internaziunalas Defensiun". Sia carriera militara ha el fatg tar ils grenadiers. Sco cumandant da cumpagnia ed oz sco maior en il stab general dal commando da las forzas spezialas ha el pudì acquistar enconuschientschas en la collavuraziun civila militara. El daventa successur da Hans Gasser che va – suenter ses engaschament da 25 onns sco manader da l'uffizi – en pensiun per la fin d'october 2016.

L'uffizi da militar e da protecziun civila è il post chantunal spezialisà per tut ils fatgs en ils secturs militar, protecziun civila e protecziun da la populaziun ed exequescha las leschas respectivas. En il sectur da la protecziun da la populaziun vegnan fatgas – ensemen cun auters posts da servetsch – las planisaziuns e las preparativas en vista a catastrofas ed – en cas da donns – coordinadas las prestaziuns d'agid necessarias.

Fotografia agiuntada:

Martin Bühler


Infurmaziuns:
president da la regenza Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  


Gremi: regenza
Funtauna: rg chanzlia chantunala dal Grischun