En sia ultima sesida ha la regenza deliberà contribuziuns da la nova politica regiunala per trais projects interchantunals en il sectur dal turissem. Ultra da quai ha ella approvà la revisiun da la planisaziun locala da l'anteriura vischnanca da Ftan sco er il project davart la protecziun cunter crudada da crappa da la vischnanca da Schmitten.

Contribuziuns da la nova politica regiunala per projects turistics interchantunals
En il rom da la nova politica regiunala (NPR) ha la regenza deliberà in sustegn finanzial per trais projects turistics interchantunals. Las contribuziuns vegnan surpigliadas mintgamai per la mesadad da la confederaziun e dals chantuns participads.

Per il project "Post da cumpetenza per il turissem dal patrimoni mundial" da l'uniun World Heritage Experience Switzerland (WHES) pajan la confederaziun ed ils chantuns Berna, Glaruna, Grischun, Neuchâtel, Son Gagl, Tessin, Vad e Vallais ina contribuziun NPR da tut en tut 1,2 milliuns francs. L'uniun furma il tetg da las organisaziuns da turissem, en ils territoris da las qualas sa chatta in lieu dal patrimoni mundial. Ella ha l'intent da concentrar las forzas sin nivel naziunal e da procurar per in turissem dal patrimoni mundial surordinà, persistent e coordinà per las organisaziuns da turissem e per ils lieus dal patrimoni mundial. En il Grischun èn quai ils lieus dal patrimoni mundial "claustra benedictina Son Jon a Müstair", "Viafier retica en la cuntrada Alvra/Bernina" sco er "Arena tectonica svizra dal Sardona". En enclegientscha cun ils auters chantuns participads (Berna, Glaruna, Neuchâtel, Son Gagl, Tessin, Vad e Vallais) ha il Grischun surpiglià la direcziun formala dal project "Post da cumpetenza davart il turissem dal patrimoni mundial" envers la confederaziun. La contribuziun d'equivalenza dal chantun Grischun importa 140 000 francs.

Per il project "Sardona PLUS" da la Heidiland turissem SA ha la regenza deliberà ina contribuziun NPR da 600 000 francs. Quella cumpiglia la contribuziun federala sco er ils pajaments d'equivalenza dals chantuns Grischun, Son Gagl e Glaruna da mintgamai 100 000 francs. L'intent da quest project è en emprima lingia quel da promover vinavant il svilup e la qualitad da products interchantunals ed interregiunals, d'augmentar l'enconuschientscha da l'arena tectonica Sardona sco patrimoni mundial da la UNESCO sto er da vivifitgar la vendita da products e da purschidas turisticas existentas e novas. La finamira principala è – grazia a la stabilitad a lunga vista – d'augmentar la valurisaziun en las regiuns participadas. Il project NPR "Sardona PLUS" è concepì per dus onns e suonda il project "Sardona activ".

Al consorzi da project "Parter collavuratur(a)s" (uniun purtadra en fundaziun) vegn pajada ina contribuziun NPR da totalmain 532 000 francs al project "Parter collavuratur(a)s en il turissem stagiunal". Da quella surpiglia la confederaziun 50 pertschient. La contribuziun d'equivalenza dals chantuns Grischun e Tessin importa mintgamai 133 000 francs. Il project "Parter collavuratur(a)s" extenda l'idea da l'economia da parter sin la politica dal persunal. Manaschis renumads da l'hotellaria e da la gastronomia lavuran ensemen e porschan a forzas da lavur stagiunalas ina perspectiva per l'entir onn. Uschia sa partan manaschis che han differents basegns maximals la stad e l'enviern las collavuraturas ed ils collavuraturs. Da quest project da pilot fan actualmain part 19 interpresas da l'hotellaria e da la gastronomia dals chantuns Grischun e Tessin sco er mintgamai ina dals chantuns Lucerna e Turgovia. Da la partida èn er las federaziuns da branscha hotelleriesuisse Grischun e Tessin. La direcziun dal project fa la scola auta da tecnica ed economia SATE Cuira.

La regenza ha approvà la revisiun totala da la planisaziun locala da Ftan
La regenza ha approvà la revisiun totala da la planisaziun locala concludida da l'anteriura vischnanca da Ftan. Ina part integrala da questa planisaziun locala è tranter auter la planisaziun d'utilisaziun per il project d'engrondir l'indriz d'ennavar en il territori da skis da las Pendicularas Motta Naluns Scuol-Ftan-Sent SA. Cun quest project, per il qual ha stuì vegnir fatga in'examinaziun ecologica, duai vegnir realisada in'ennavada cumpletta da la pista che maina giu a Ftan. Perquai che in pèr da las surfatschas che duain vegnir ennavadas tangheschan biotops da palì prezius, ston las Pendicularas Motta Naluns – per cumpensar questas intervenziuns – serrar respectivamain stritgar or dal plan da pistas tschertas pistas che mainan er tras territoris sensibels.

Ordinaziun da sanaziun per pliras ovras electricas grischunas
La regenza grischuna ha ordinà per diversas ovras electricas in'obligaziun da sanar l'accessibladad dals peschs. Pertutgads èn trais stabiliments da las Ovras electricas d'Engiadina sco er dus stabiliments da las Ovras electricas dal Rain posteriur.
En il chantun Grischun èn 65 obstachels che derivan d'ovras electricas vegnids classifitgads sco obstachels che ston vegnir sanads. Fin ussa ha la regenza relaschà 31 ordinaziuns da sanaziun. La nova lescha federala davart la protecziun da las auas pretenda che l'accessibladad dals peschs vegnia restabilida en ils flums svizzers. Obstachels ch'impedeschan essenzialmain la migraziun dals peschs ston vegnir sanads. Uschia èn ils chantuns obligads tenor lescha da planisar – tar ovras idraulicas existentas – mesiras che las societads d'ovras electricas ston realisar.

Approvà il project "Protecziun cunter crudada da crappa Schmitten vest"
La regenza ha approvà il project "Protecziun cunter crudada da crappa Schmitten vest" ed ha concedì ina contribuziun chantunala da 481 900 francs. Da las paraids-grip sur il territori d'abitadi da la vischnanca da Schmitten sa distatga adina puspè crappa pli gronda e pli pitschna che po rudlar giu da las spundas stippas fin al territori d'abitadi. Per impedir quai vegnan montadas ulteriuras raits cunter crudada da crappa che han ina lunghezza totala da 120 meters, ed in rempar existent vegn auzà sin 4 meters e prolungà a totalmain 70 meters.
Il sectur da privel è vegnì determinà gia pli baud en in plan da las zonas da privel ed ha furmà la basa per construir ils onns 1993 e 1994 las mesiras da protecziun cunter crudada da crappa. En il rom d'ina revisiun da la planisaziun locala èn las zonas da privel vegnidas giuditgadas da nov l'onn 2009. En quest connex èsi sa mussà ch'igl exista en dus lieus – malgrà las ovras da protecziun existentas – in privel pli grond per il territori d'abitadi che cumprovà en il plan da las zonas da privel. Sin basa da quests fatgs ha la vischnanca da Schmitten incumbensà l'uffizi da guaud e privels da la natira d'examinar e d'elavurar mesiras tecnicas per reducir la situaziun da privel.
Plan da mesiras davart la protecziun cunter crudada da crappa Schmitten

Projects da votaziun dals 5 da zercladur 2016
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia, ils 5 da zercladur 2016:
- iniziativa dal pievel dals 30 da matg 2013 "A favur dal servetsch public"
- iniziativa dal pievel dals 4 d'october 2013 "Per in'entrada da basa nuncundiziunada"
- iniziativa dal pievel dals 10 da mars 2014 "Per ina finanziaziun gista dal traffic"
- midada dals 12 da december 2014 da la lescha federala davart la reproducziun cun assistenza medicala (lescha davart la medischina da reproducziun, LRAM)
- midada dals 25 da settember 2015 da la lescha d'asil (LAsil)
La dumengia, ils 5 da zercladur 2016, na vegnan nagins projects chantunals en votaziun.


Gremi: regenza
Funtauna: rg chanzlia chantunala dal Grischun