La regenza grischuna ha nominà Riccardo Thöni sco nov manader da l'uffizi da persunal chantunal. El vegn a surpigliar questa funcziun il 1. da november 2016.

La regenza grischuna ha elegì Riccardo Thöni, da Val Müstair, sco nov manader dal post da servetsch. El ha 52 onns ed è econom da manaschi SEA. Thöni arriva da l'economia privata en l'administraziun chantunala. El è stà durant blers onns activ en differentas branschas localas ed internaziunalas ed ha lavurà cun success en tut ils secturs dals fatgs da persunal. Actualmain lavura Thöni en il Liechtenstein per ina banca privata ch'è activa sin plaun internaziunal. El daventa successur da Werner Finck che va – suenter 8 onns sco manader da l'uffizi – tenor l'urden en pensiun per la fin d'october 2016.

L'uffizi da persunal dal Grischun è il post chantunal spezialisà per dumondas dal persunal. Sco uffizi interdisciplinar s'occupa el da tut ils 39 posts da servetsch (uffizis e secretariats dals departaments) da l'administraziun chantunala dal Grischun. El fa mintga onn passa 800 contracts da lavur e passa 50 000 rendaquints da salari. Ultra da las incumbensas centralas sco recrutaziun, scolaziun e furmaziun supplementara, management dals salaris/dal temp sco er dretg da persunal stat l'uffizi da persunal mintga di en il servetsch da superiurs e da collavuraturas e collavuraturs.

Il manader da l'uffizi da persunal è suttamess directamain a la scheffa dal departament da finanzas e vischnancas.

Fotografia agiuntada: Riccardo Thöni


Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01; e-mail: Barbara.Janom@dfg.gr.ch


Gremi: regenza
Funtauna: rg chanzlia chantunala dal Grischun