En sia emprima sesida da l'onn 2016 ha la regenza deliberà il rapport davart il program da construcziun da vias 2017 fin 2020. Plinavant ha ella prendì posiziun tar las midadas da la lescha federala davart ils agids finanzials per la tgira d'uffants cumplementara a la famiglia. Ultra da quai ha ella approvà la revisiun parziala da la planisaziun locala da Churwalden.

Rapport davart il program da construcziun da vias 2017 fin 2020
Il rapport davart il program da construcziun da vias 2017 fin 2020 vegn suttamess al cussegl grond per prender enconuschientscha. Tut en tut èn previs 767 milliuns francs per construir e per mantegnair las vias. Il rapport cuntegna principalmain ina glista dals projects concrets planisads per la perioda da program 2017 fin 2020. Quai en coordinaziun cun il program da la regenza correspundent e resguardond ils meds finanzials ch'èn previs en il plan da finanzas.
Il rapport dat in sguard enavos sin il program current e cuntegna indicaziuns davart las midadas realisadas en il sectur da las vias ed en l'organisaziun da l'uffizi da construcziun bassa. Il nov program da construcziun da vias sa basa sin ils programs precedents en quai che concerna la direcziun strategica e la priorisaziun dals projects. Las expensas previsas per la construcziun ed il mantegniment da las vias èn levamain pli autas en cumparegliaziun cun la perioda precedenta. Concretamain prevesa il chantun investiziuns da 431 milliuns francs per ils proxims quatter onns per construir da nov e per renovar las vias principalas e las vias da colliaziun. Plinavant s'augmenta anc adina il basegn da reparar la rait actuala da vias. Per la perioda da program 2017 fin 2020 èn perquai previs 336 milliuns francs per il mantegniment architectonic da las vias, quai èn 6 milliuns francs dapli ch'enfin ussa.
Da nov s'exprima il program er davart il tema "traffic betg motorisà" che daventa pli e pli impurtant. Da quest fatg vegni tegnì quint cun la revisiun parziala da la lescha davart las vias ch'è entrada en vigur il 1. da schaner 2016.
Cunquai che la planisaziun, la projectaziun e la construcziun en connex cun projects da traffic basegnan bler temp pervia da las pretensiuns pli severas e dals andaments adina pli cumplitgads, dovri cundiziuns generalas segiras a lunga vista. Cun il nov program da construcziun da vias da quatter onns che sa basa sin la planisaziun da finanzas preschenta la regenza ina basa per ademplir las incumbensas dal chantun en il sectur da las vias ch'è uschè fidada ed uschè transparenta sco pussaivel.

Midada da la lescha federala davart ils agids finanzials per la tgira d'uffants cumplementara a la famiglia
La regenza prenda posiziun tar las midadas da la lescha federala davart ils agids finanzials per la tgira d'uffants cumplementara a la famiglia. Il cussegl federal propona d'integrar en la lescha existenta ina promoziun supplementara da la tgira d'uffants cumplementara a la famiglia per meglierar la cumpatibilitad da la famiglia cun la professiun. Quella duai esser da durada limitada e vegnir dotada cun in nov rom finanzial da tut en tut 100 milliuns francs.
La regenza beneventa da princip la decisiun dal cussegl federal d'adattar las tariffas da geniturs en tschertas classas d'entrada e da concepir uschia anc meglier la cumpatibilitad da la famiglia e da la professiun. Cunquai ch'il sistem vertent è però sa cumprovà, è la regenza da l'avis ch'ina finanziaziun da stimulaziun limitada a 3 onns sco ch'ella è planisada en il sboz da la lescha na possia avair nagin effect duraivel. Perquai duess la confederaziun sa participar sco fin ussa cun ina tariffa da contribuziun fixa als custs per la tgira d'uffants cumplementara a la famiglia. Sa basond sin quai ed er sin las experientschas ch'èn vegnidas fatgas cun la finanziaziun da novas purschidas propona ella perquai da duvrar meds finanzials federals supplementars per prolungar la finanziaziun iniziala existenta e betg per ina nova finanziaziun da stimulaziun.

Ulteriuras infurmaziuns: Consultaziuns currentas da la confederaziun

La regenza ha approvà la revisiun parziala da la planisaziun locala da Churwalden
La revisiun parziala da la planisaziun locala, concludida da la vischnanca da Churwalden ils 8 da settember 2015, vegn approvada da la regenza. Sco singuls meds da planisaziun èn vegnids approvads la revisiun parziala da la lescha da construcziun, il plan da zonas, il plan general da furmaziun 1:500 "Terminal da bus", ed il plan general d'avertura 1:1000 "Terminal da bus".
Cun questa revisiun parziala vegnan stgaffidas las premissas da la planisaziun d'utilisaziun per realisar in terminal da bus en il sectur dal parcadi existent Sand. Il terminal da bus cun previsiblamain sis urs da fermada per l'auto da posta permetta in manaschi da bus pendular tranter Cuira e Churwalden, il lieu d'entrada en il territori da skis da Lai/Valbella.


© Comet Photoshopping GmbH / Dieter Enz


Gremi: regenza
Funtauna: rg chanzlia chantunala dal Grischun