En sia ultima sesida ha la regenza stgaffì in'ulteriura purschida per collocar e per tgirar requirentas e requirents d'asil sco er fugitivas e fugitivs minorens betg accumpagnads. Plinavant ha ella prendì posiziun tar ina charta averta concernent il tema da la contaminaziun da l'aria en la part sut dal Mesauc ed ha deliberà per la consultaziun la revisiun parziala da la lescha davart la protecziun cunter incendis.

Collocaziun ed assistenza da requirentas e requirents d'asil sco er da fugitivas e fugitivs minorens betg accumpagnads
La regenza ha stgaffì in'ulteriura purschida per collocar e per tgirar requirentas e requirents d'asil sco er fugitivas e fugitivs minorens betg accumpagnads. Ella ha approvà l'incarica da prestaziun tranter il chantun Grischun e l'uniun Casa Depuoz, Trun. En la chasa d'abitar "Albertushof" da la claustra da Glion duain vegnir tgirads dudesch giuvenils. In'extensiun a 16 persunas è pussaivla. Cun la purschida da l'uniun Casa Depuoz vegnan per regla tgirads giuvenils a partir dal 16. onn da vita. En vista ad ina concepziun da la vita autonoma ed economicamain independenta pon questas persunas profitar da questa purschida er sur lur maiorennitad or.
Gia il settember 2015 aveva il chantun concludì ina incarica da prestaziun analoga cun la fundaziun "Gott hilft" per realisar ina purschida d'abitar e da tgira.
Il svilup dal dumber da requirentas e requirents d'asil lascha spetgar ch'il dumber da requirentas e requirents d'asil e da fugitivas e fugitivs minorens betg accumpagnads dastgass crescher vinavant ils proxims mais. Per ch'ellas ed els possian bandunar svelt las structuras d'asil, èsi impurtant da concluder speditivamain incaricas da prestaziun cun terzas varts pertutgant la collocaziun e la tgira.

Charta averta concernent il tema da la contaminaziun da l'aria en la part sut dal Mesauc
La regenza ha prendì posiziun tar la charta averta da dunna Nicoletta Noi dals 29 da december 2015 pertutgant il tema da la contaminaziun da l'aria en la part sut dal Mesauc. La contaminaziun da l'aria a San Vittore e stada fitg gronda l'ultim december e la limita media per di da pulvra fina fixada en l'ordinaziun davart la protecziun da l'aria è vegnida surpassada durant 29 dis.
En sia resposta punctuescha la regenza che la situaziun en la part sut dal Mesauc na saja betg nova. Las valurs autas da pulvra fina cunzunt durant l'enviern èn gia stadas l'object da differentas retschertgas da l'igiena da l'aria per eruir las funtaunas da la pulvra fina en la part sut dal Mesauc. Tut las retschertgas mussan en moda concordanta che la combustiun da biomassa (stgaudaments da laina) è il motiv principal per l'impestaziun gronda da pulvra fina durant l'enviern. Gia l'onn 2014 ha la regenza deliberà in studi da concept correspundent per in plan da mesiras regiunal per cumbatter cunter l'impestaziun da pulvra fina en la part sut dal Mesauc. Las mesiras fixadas èn vegnidas elavuradas en stretga collavuraziun cun las vischnancas pertutgadas. Il plan da mesiras per la part sut dal Mesauc vegn redigì actualmain da l'uffizi per la natira e l'ambient (UNA) en collavuraziun cun las vischnancas, cun la populaziun e cun las autoritads da scola ed è per part gia vegnì realisà.

Resposta da la regenza

Il chantun ha cumprà l'areal da la Neumühle a Cuira
Il chantun Grischun ha cumprà la Neumühle SA cun sedia a Cuira. La Neumühle SA è ina pura societad d'immobiglias che posseda l'areal da la Neumühle en il chantun da la Wiesentalstrasse e da la Gürtelstrasse en vischinanza directa da la staziun da Cuira. Cun l'uffizi per la natira e l'ambient e cun l'uffizi dal servetsch social è il chantun actualmain il locatari principal dals edifizis existents. Ultra da quai mainan ils servetschs psichiatrics dal Grischun sin quest areal in ambulatori per persunas dependentas da drogas.
Il bain immobigliar bain accessibel e situà centralmain ha ina surfatscha da circa 8500 meters quadrat e sa chatta en la zona maschadada. El po vegnir duvrà en differentas modas ed è spezialmain adattà sco lieu per l'administraziun u eventualmain per ils instituts chantunals.
Fin a la midada al center administrativ Sinergia vegn il chantun a duvrar questas localitads en emprima lingia sez. Er las relaziuns da locaziun cun terzas persunas vegnan cuntinuadas. La societad anonima vegn liquidada ed il bain immobigliar vegn alura integrà en il portfolio d'immobiglias dal chantun sco acquist da terren preventiv.

La protecziun cunter incendis vegn adattada als basegns da l'applicaziun da la lescha e da la giurisdicziun
La regenza ha deliberà per la consultaziun la revisiun parziala da la lescha davart la protecziun preventiva cunter incendis ed ils fatgs da pumpiers en il chantun Grischun (lescha davart la protecziun cunter incendis). Il motiv per la revisiun parziala da la lescha davart la protecziun cunter incendis è tranter auter la giurisdicziun da la dretgira administrativa. Uschia sto la disposiziun davart l'admissiun da las maistras e dals maisters spazzachamin vegnir adattada a la giurisdicziun da la dretgira administrativa. Plinavant vegn stgaffida ina basa giuridica per conceder contribuziuns da gestiun da l'assicuranza d'edifizis dal Grischun (GVG) a las vischnancas per garantir la qualitad ed il mantegniment dals indrizs dal provediment cun aua da stizzar fieu. Ils indrizs dal provediment cun aua da stizzar fieu èn oz installads praticamain en tut las vischnancas ed èn en in bun stadi. I vala ussa da procurar ch'ils indrizs dal provediment cun aua da stizzar fieu vegnian mantegnids uschia, ch'els correspundan permanentamain a las pretensiuns qualitativas da las directivas specificas respectivas.
Plinavant vegn profità da l'occasiun per adattar las disposiziuns respectivas a la legislaziun federala davart las materias explosivas ch'è vegnida revedida. Il sboz da consultaziun prevesa che l'assicuranza d'edifizis po scumandar ubain interrumper in'occurrenza cun in potenzial da periclitaziun spezial, sch'ina mancanza areguard la tecnica da protecziun cunter incendis vi d'in edifizi u vi d'in stabiliment na vegn betg eliminada avant il cumenzament da l'occurrenza respectivamain immediatamain suenter l'avertiment.
La consultaziun dura fin ils 30 d'avrigl 2016.

Documents da consultaziun: www.gr.ch (consultaziuns currentas/DGSS)

290 contingents d'abitaziuns da vacanzas per il chantun Grischun
Per l'onn 2016 survegn il chantun Grischun 290 contingents da la confederaziun per permetter l'acquist d'abitaziuns da vacanzas tras persunas a l'exteriur. La regenza grischuna desista da reglar la repartiziun dal contingent per l'onn 2016. Quai perquai ch'ils contingents attribuids al chantun n'èn dapi onns betg pli vegnids duvrads dal tuttafatg e perquai ch'i na vegn betg a sa midar insatge en chaussa pervia da la lescha davart las abitaziuns secundaras ch'è entrada en vigur en il fratemp.

Exclusiun da la rait da vias chantunalas
La via d'Engiadina veglia, traject Scuol – Nairs, vegn excludida per il 1. da mars 2016 da la rait da vias chantunalas e cedida a la vischnanca da Scuol sco proprietad e per il mantegniment.
L'onn 1997 ha la regenza approvà ina correcziun dal traject parzial Nairs – Scuol vest da la via d'Engiadina. Tenor quest conclus avess la via chantunala veglia stuì vegnir cedida a la vischnanca da Scuol, suenter che la correcziun da la via è stada terminada, e concepida da nov sco via per ir a chaval, per scarsolar e per ir cun velo. Perquai che la via d'Engiadina veglia è vegnida duvrada per in tschert temp sco via d'access per construir la punt da l'En a Vulpera, è ella restada per entant en la proprietad dal chantun.

Via d'Engiadina veglia, traject Scuol – Nairs


Gremi: regenza
Funtauna: rg chanzlia chantunala dal Grischun