La cumissiun per ambient, traffic ed energia propona al cussegl grond da prender enconuschientscha en moda affirmativa dal rapport davart il program da construcziun da vias 2017 – 2020. Il cussegl grond vegn a tractar quest rapport en la sessiun d'avrigl 2016.

Il rapport davart il program da construcziun da vias 2017 – 2020 vegn suttamess al cussegl grond per prender enconuschientscha. La cumissiun per ambient, traffic ed energia (CATE) dal cussegl grond ha predeliberà il rapport da la regenza sut la direcziun dal president Andreas Felix (Haldenstein) ed en preschientscha dal cusseglier guvernativ Mario Cavigelli sco schef dal departament da construcziun, traffic e selvicultura.

I sa tracta dal 3. rapport davart il program da construcziun da vias. El cumpiglia la perioda da program dals onns 2017 fin 2020. Quai en coordinaziun cun il program da la regenza correspundent e resguardond ils meds finanzials ch'èn previs en il plan da finanzas. Il rapport cuntegna oravant tut ina glista dals projects previs concretamain, sco l'engrondiment da vias principalas e da vias da colliaziun sco er il mantegniment architectonic da vias chantunalas. Supplementarmain èn vegnids integrads da nov en il program ils secturs dal traffic betg motorisà sco er ils projects da construcziun per lavuratoris e per basas tecnicas.

Perquai che la cumissiun è stada senza resalva d'accord d'entrar en il rapport, sustegna ella er en la tractativa detagliada unanimamain las propostas da la regenza. La cumissiun propona al cussegl grond da declerar che las strategias formuladas da la regenza sustegnian las finamiras dals effects, la priorisaziun dals projects da construcziun, l'impundaziun dals meds finanzials, il program da l'engrondiment da las vias principalas e da las vias da colliaziun sco er il program dal mantegniment da las vias chantunalas.


Infurmaziuns:
Andreas Felix (Haldenstein), president da la cumissiun per ambient, traffic ed energia, tel. 081 257 08 08


Gremi: cumissiun per ambient, traffic ed energia
Funtauna: rg cumissiun per ambient, traffic ed energia