Il rapport davart il provediment da la sanadad dal Grischun che cumpara per l'emprima giada dat ina survista da las prestaziuns dals ospitals, dals servetschs da salvament, da las clinicas da reabilitaziun, da las chasas da persunas attempadas e da tgira e dals servetschs da spitex en il chantun. El sa drizza tant a las autoritads sin plaun chantunal e communal, a las persunas responsablas, a las collavuraturas ed als collavuraturs dals singuls furniturs da prestaziuns sco er en general a las persunas che s'interessan per ils fatgs da sanadad.

Las prestaziuns dals furniturs instituziunals èn cuntegnidas per part gia en ils indicaturs publitgads mintga onn da l'uffizi da sanadad. Tge che mancava percunter fin ussa è in commentari da questas datas sco er ina cumparegliaziun da plirs onns da las prestaziuns dals singuls furniturs. Questa largia vegn serrada cun il rapport davart il provediment da la sanadad.

En ina preschentaziun survesaivla vegni infurmà davart las prestaziuns dals ospitals, dals servetschs da salvament, da las clinicas da reabilitaziun, da las chasas da persunas attempadas e da tgira e dals servetschs da spitex en il chantun, i vegnan fatgas cumparegliaziuns tranter ils furniturs da prestaziuns e las regiuns da provediment e mussadas eventualas midadas tar la dimensiun da las prestaziuns furnidas dals singuls manaschis. A las persunas responsablas dals singuls furniturs da prestaziuns vegn cun quai dà en maun in instrument per giuditgar lur manaschi en in context cumplessiv. Politichers da sanadad sco er persunas che han in interess vi dals fatgs da sanadad survegnan – cun agid da quest rapport – infurmaziuns pli detagliadas davart il svilup dals fatgs da sanadad en il chantun Grischun.

Il rapport davart il provediment da la sanadad è vegnì redigì dal center per la perscrutaziun da la politica economica da la scola auta da tecnica ed economia Cuira en cooperaziun cun il departament da giustia, segirezza e sanadad e vegn a cumparair en il futur ina giada l'onn.

Fotografia agiuntada:

Collavuraziun dal departament da giustia, segirezza e sanadad cun la scola auta da tecnica ed economia Cuira: Gion Claudio Candinas, secretari dal departament e responsabel per il sectur "sanadad", president da la regenza Christian Rathgeb, schef dal departament da giustia, segirezza e sanadad, Monika Engler, manadra dal project da la SATE e Rudolf Leuthold, schef da l'uffizi da sanadad (da sanestra).


Infurmaziuns:
president da la regenza dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad