En sia ultima sesida ha la regenza prendì posiziun tar differents projects da la confederaziun. Plinavant ha ella approvà ina punt per peduns e per velos sur il Rain anteriur e concedì ina contribuziun chantunala per la fundaziun "Greater Zurich Area Standortmarketing".

Posiziun tar il program da stabilisaziun 2017-2019
La regenza ha prendì posiziun tar il program da stabilisaziun 2017-2019 da la confederaziun. Cumpareglià cun la planisaziun vertenta prevesa il program distgargias da circa 1 milliarda francs a partir da l'onn 2017. Qua tras stgaffescha la confederaziun la basa per observar en la proxima legislatura las prescripziuns dal frain a l'indebitament.
En sia brev a la confederaziun sustegna la regenza grischuna la posiziun da la conferenza da las regenzas chantunalas (CdC). Las regenzas chantunalas èn da princip d'accord cun la realisaziun d'in nov program da spargn per reducir il deficit structural da la confederaziun. Igl è impurtant che las finanzas federalas restian saunas e solidas. Las regenzas chantunalas pretendan dentant explicitamain ch'il program da stabilisaziun 2017-2019 na chaschunia betg in indossament da las chargias als chantuns. Ils chantuns n'han pli nagin spazi per surpigliar custs che vegnan indossads da la confederaziun. Perquai refusan ils chantuns differentas mesiras da spargn en spezial en ils secturs prestaziuns supplementaras da la AVS/AI, fond per l'infrastructura da viafier, reducziun individuala da las premias sco er migraziun ed integraziun.
Supplementarmain renda la regenza attent ad ulteriuras mesiras che ston medemamain vegnir examinadas cun in egl critic. Uschia supplitgescha la regenza da desister da la reducziun en il sectur da la promoziun da linguas. La reducziun da la contribuziun correspundenta per 33 pertschient avess per consequenza che differents projects chantunals stuessan vegnir sminuids u schizunt smess dal tuttafatg. Plinavant pretenda ella da renunziar ad ina reducziun dals meds finanzials federals per la construcziun da stabiliments da sport d'impurtanza naziunala. Er betg d'accord n'è la regenza grischuna cun il fatg ch'ils apports, che n'èn betg vegnids attribuids ils onns 2016 e 2017 al fond d'infrastructura, duain vegnir bunifitgads cumplainamain al fond per las vias naziunalas ed il traffic d'aglomeraziun (NAF). Ella vuless che quests apports, ch'èn suspendids ad interim, vegnian attribuids proporziunalmain er a la finanziaziun speziala futura "traffic sin via", per ch'er las vias principalas en ils territoris da muntogna ed en las regiuns perifericas survegnian contribuziuns finanzialas. Plinavant è la regenza da l'avis ch'i na saja betg raschunaivel che la lescha federala davart activitads da ristga vegnia abolida senza cumpensaziun en il rom d'in program da spargn, cunquai ch'ils respargns sin plaun federal èn plitgunsch pitschens. Tras l'aboliziun crodia davent l'obligaziun da dumandar ina permissiun per activitads al liber sco canyoning, rafting u bungee jumping. Las discussiuns necessarias davart ils cuntegns e davart il mantegniment da la lescha na possian betg pli vegnir manadas, sche la lescha vegnia abolida.

Posiziun da la CdC

Midada da la lescha federala davart l'assicuranza d'invaliditad
La regenza è sa participada a la procedura da consultaziun tar la midada da la lescha federala davart l'assicuranza d'invaliditad (ulteriur svilup da la AI). Il project drizza il focus sin l'ulteriur svilup dals instruments existents. La finamira principala è quella da trair a niz cumplainamain il potenzial d'integraziun da las persunas assicuradas e da rinforzar la pussaivladad da vegnir intermedià, quai en spezial per uffants, per giuvens creschids e per persunas assicuradas cun malsognas psichicas.
Ord vista da la politica sociala è l'assicuranza d'invaliditad (AI) fitg impurtanta en il sistem da las assicuranzas socialas cun sias trais pitgas "integraziun", "substituziun da las entradas da gudogn" sco er "agid per gidar sasez". Ord vista da la regenza èsi bun ch'i vegn dada in'attenziun speziala als uffants ed als giuvenils sco er als umans cun ina restricziun psichica en vista al svilup da las novas rentas e dals custs. Uschenavant sustegna ella ils plans da l'ulteriur svilup da la AI. Però è ella da l'opiniun ch'il potenzial da mesiras na saja anc betg exaust cun quai. Il sboz avant maun na cuntegna naginas ponderaziuns davart pussaivlas propostas da spargn raschunaivlas e supportablas areguard la politica sociala en il sectur da las contribuziuns. La regenza dubitescha ch'i possia vegnir cuntanschida a vista pli lunga ina stabilitad finanziala da la AI mo cun las mesiras proponidas. Ella spetga che la confederaziun tiria en consideraziun ulteriuras mesiras e fetschia autras propostas, betg mo per sviluppar vinavant, mabain er per stabilisar respectivamain sanar consequentamain la AI. Quai cun mesiras ch'èn tuttavia socialmain supportablas e che na chaschunan nagin spustament en auters sistems.

Fegliet infurmativ: Ulteriur svilup da la AI

Mess en vigur il Plan d'instrucziun 21 Grischun
La regenza grischuna ha approvà il Plan d'instrucziun 21 GR inclusiv las tavlas da lecziuns. Per la scolina fin la 2. classa dal stgalim secundar I entra el en vigur l'onn da scola 2018/19, per la 3. classa dal stgalim secundar I l'onn da scola 2019/20.
Il Plan d'instrucziun 21, che la conferenza dals directurs chantunals da l'educaziun publica da la Svizra tudestga ha deliberà l'atun 2014, vegn surpiglià dal chantun en moda cumplessiva. Cuntegns nunliants èn vegnids cumplettads, ed areguard las cundiziuns generalas chantunalas èn vegnidas fatgas adattaziuns.
Las differentas tavlas da lecziuns da las trais regiuns linguisticas èn coordinadas il meglier pussaivel ina cun l'autra ed èn coerentas cun auters chantuns.
Il conclus da la regenza è vegnì prendì sin fundament d'in rapport cumplessiv davart la realisaziun dal Plan d'instrucziun 21 GR. Quest rapport mussa, cun tge mesiras che las scolas vegnan preparadas per il nov plan d'instrucziun. Per che quest process da realisaziun reusseschia optimalmain, vegnan las mesiras da realisaziun chantunalas repartidas sin sis onns (2016 fin 2021). Las mesiras cumenzan l'atun 2016 e cumpiglian en spezial occurrenzas d'infurmaziun, cussegliaziuns per las scolas sco er furmaziuns supplementaras obligatoricas per las persunas d'instrucziun. Tras quest proceder èsi garantì che tut las scolas grischunas adempleschan cumplainamain il plan d'instrucziun a partir da l'onn da scola 2021/22.
Sco proxim pass propona la regenza il zercladur 2016 al cussegl grond da conceder in credit d'impegn per realisar il nov Plan d'instrucziun 21 GR.

Ulteriuras infurmaziuns: uffizi per la scola populara ed il sport

Approvà ina punt per peduns e per velos sur il Rain anteriur
La regenza ha approvà il project da construcziun per ina punt per peduns e per velos sur il Rain anteriur tranter Castrisch e Schluein. Per ils custs da construcziun conceda ella ina contribuziun chantunala maximala da 747 000 francs a l'uniun "Die Rheinschlucht/Ruinaulta". La punt existenta sur il Rain che serva sulettamain sco surpassadi per in conduct d'aua persa dal consorzi per aua persa Foppa stuess vegnir sanada e vegn perquai disfatga. Il conduct vegn integrà en la nova punt per il traffic betg motorisà.
La punt planisada gioga ina rolla impurtanta per il traffic betg motorisà quotidian, saja quai sco via da scola, sco access al stabiliment da sport regiunal u er per il traffic da cumpra. La nova colliaziun sur il Rain anteriur è ultra da quai ina part integrala essenziala dal concept general per in'avertura moderada da la Ruinaulta. Il project custa totalmain 2,09 milliuns francs.

Foto dal model da la punt per peduns e per velos tranter Castrisch e Schluein,
funtauna: Casutt Wyrsch Zwicky AG

Contribuziun chantunala per la fundaziun "Greater Zurich Area Standortmarketing"
A la fundaziun "Greater Zurich Area Standortmarketing" vegn pajada ina contribuziun chantunala annuala da 99 180 francs per ils onns 2016 fin 2019. La fundaziun è vegnida fundada l'onn 1998 dal chantun Turitg. Sia finamira è quella da mantegnair e da rinforzar cuminaivlamain la posiziun dominanta dal spazi economic Greater Zurich Area en la concurrenza europeica e globala.
Dapi 15 onns è il chantun Grischun conpurtader da la fundaziun "Greater Zurich Area Standortmarketing". La fundaziun porscha al chantun Grischun in'occasiun empermettenta per augmentar il grad d'enconuschientscha da l'atgna plazza economica. Perquai ch'il chantun n'è en proporziun betg uschè grond e perquai che las resursas èn stgarsas, èn restrenschidas las pussaivladads da realisar cun success in agen marketing internaziunal dal lieu.

Adattaziun dal plan directiv "Monument natiral Ruinaulta"
La regenza ha approvà il plan directiv regiunal "Monument natiral Ruinaulta", adattaziun 2015, concludì dal parlament regiunal Surselva ils 29 da settember 2015. Plinavant ha ella concludì l'actualisaziun ed adattaziun correspundenta da l'object en il plan directiv chantunal.
Il project cumpiglia la planisaziun d'ina senda da viandar nuninterrutta per lung dal Rain anteriur sin il traject da la punt Isla Bella fin a la staziun da Trin sco er mesiras per proteger la cuntrada ed ils biotops e per meglierar il concept da protecziun e d'utilisaziun 2005. L'intervenziun per la senda nuninterrutta per lung da la Viafier retica, cun in tunnel da peduns ch'è planisà sin il traject Ransun, vegn considerada sco supportabla. Quai pervia dal grond potenzial economic per il turissem da stad e per la recreaziun vischina, pervia da las meglieraziuns essenzialas per la protecziun da la flora e da la fauna sco er sin basa da l'impurtanza naziunala da questa ruta da viandar.

Approvà la revisiun parziala da la lescha da construcziun da Surses
La regenza ha approvà la revisiun parziala da la lescha da construcziun ed il plan general d'avertura 1:1000 "Revisiun parziala Bursa", concludids da la vischnanca da Surses ils 30 da november 2015. Tras il project vegnan creadas las premissas da la planisaziun d'utilisaziun per pudair sviluppar vinavant ad in "campus d'energia Savognin" la purschida da scolaziun e da furmaziun supplementara al lieu da mastergn Bursa/Padnal. Per il "campus d'energia Savognin" è planisà – sper las localitads existentas dal center da cumpetenza davart il tema "construcziun + energia" – in nov edifizi cun alloschis e cun restauraziun.


Gremi: regenza
Funtauna: rg chanzlia chantunala dal Grischun