Las directuras ed ils directurs da giustia e polizia dals chantuns da la Svizra orientala (CDCGP-ost) sustegnan la revisiun da la lescha d'asil che vegn en votaziun ils 5 da zercladur 2016. Sche las proceduras d'asil vegnan realisadas pli svelt che fin ussa e però tuttina en moda legalmain gista e correcta, profiteschan tut las parts participadas da quai: en emprima lingia ils chantuns e las vischnancas, la confederaziun e la finala er las requirentas ed ils requirents d'asil.

La collocaziun da requirentas e requirents d'asil è ina gronda sfida per ils chantuns e las vischnancas. Cun la revisiun da la lescha d'asil ch'il parlament federal ha deliberà ils 25 da settember 2015 e cunter la quala è vegnì fatg in referendum, duai il sectur d'asil vegnir structurà da nov. 60 pertschient da las proceduras d'asil duain vegnir terminadas cun vigur legala en centers da la confederaziun; sin ils chantuns e sin las vischnancas duain vegnir repartids mo pli quels 40 pertschient da las requirentas e dals requirents d'asil cun dumondas che pretendan scleriments pli detagliads. L'evaluaziun dal manaschi da test a Turitg ha mussà che las proceduras pon effectivamain vegnir acceleradas, senza che la protecziun giuridica u la qualitad da las decisiuns patissan da quai.

La conferenza da las directuras e dals directurs chantunals da giustia e polizia da la Svizra orientala, che cumpiglia ils chantuns Appenzell Dador, Appenzell Dadens, Glaruna, Grischun, Schaffusa, Son Gagl, Turgovia e Turitg, sustegna unanimamain questa revisiun da la lescha d'asil. Ella recumonda a las votantas ed als votants d'acceptar il project da votaziun e da votar cun persvasiun GEA ils 5 da zercladur 2016. Ella na s'empermetta da l'acceleraziun da las proceduras e da l'execuziun consequenta da las spedidas numnadamain betg mo in signal vers anora, mabain correspundentamain er respargns da custs en connex cun la collocaziun, cun l'assistenza e cun l'integraziun da las requirentas e dals requirents d'asil. La clera cunfinaziun da la cumpetenza tranter la confederaziun ed ils chantuns vegn dal rest er a garantir ch'i possia er effectivamain vegnir concedida la protecziun necessaria a las persunas che basegnan protecziun.


Infurmaziuns:
Christian Rathgeb, president da la CDCGP-ost, tel. 081 257 25 01, e-mail: Christian.Rathgeb@djsg.gr.ch  


Gremi: conferenza da las directuras e dals directurs chantunals da giustia e polizia da la Svizra orientala
Funtauna: rg conferenza da las directuras e dals directurs chantunals da giustia e polizia da la Svizra orientala