La producziun da current solar ha en il Grischun in anc grond potenzial da creschientscha, sco che studis mussan. Ina nova applicaziun d'internet messa a disposiziun dal chantun Grischun gida a chattar il dretg lieu per la producziun da current solar.

Ina finamira da la politica chantunala d'energia è quella d'augmentar la producziun d'electricitad or da novas energias regenerablas. Da quai fa part er la producziun da current solar cun implants da fotovoltaica. Per mussar, tge surfatschas ch'èn spezialmain adattadas per la producziun da current solar, ha il chantun sviluppà in'applicaziun d'internet. Il program è concepì per persunas privatas, per interpresas sco er per construiders d'implants.

En l'applicaziun d'internet poi vegnir cliccà sin in singul punct dal territori chantunal, entant ch'en ina fanestra separada po vegnir endatada l'inclinaziun e l'exposiziun dal tetg resp. dal modul da fotovoltaica. Sco resultat survegnan ins las indicaziuns concernent las uras da kilowatt ch'ins po spetgar per onn e per meter quadrat. Tgi che planisescha da construir in implant, po stimar uschia il retgav ch'el po generar cun l'implant. Sco basa da datas servan datas da satellit ch'èn vegnidas preparadas spezialmain per il territori da muntogna. Uschia è vegnida resguardada la sumbriva da las muntognas e l'effect dals nivels, per survegnir datas da radiaziun ch'èn uschè realisticas sco pussaivel.

Applicaziun d'internet: uffizi per il svilup dal territori

Valitaziun dal potenzial dal current solar en il Grischun
Ch'il current solar ha in grond potenzial da creschientscha en il Grischun mussa in studi d'Interreg. En quest studi èsi vegnì analisà quant current solar che pudess vegnir producì a lunga vista, sch'i vegnissan installads implants da fotovoltaica sin la gronda part dals tetgs dal Grischun. Ins ha resguardà mo ils edifizis entaifer las zonas da construcziun, ils centers dals vitgs cun ina substanza architectonica istorica n'èn betg vegnids inclus. La quantitad d'energia ch'è vegnida calculada uschia importa circa 1150 uras da gigawatt per onn. Quai correspunda a quasi la mesadad da l'entir consum d'electricitad en il chantun Grischun. Il potenzial valità è almain tschintg giadas pli grond che la finamira energetica ch'il chantun Grischun vul cuntanscher fin l'onn 2035.

Er ordaifer las zonas da construcziun datti bleras pussaivladads per producir electricitad. Quai per lung d'infrastructuras ch'existan gia, sco per exempel tar paraids da protecziun cunter la canera, tar telefericas, tar runals u tar lais da fermada. In'utilisaziun da la fotovoltaica en la cuntrada libra u sin edifizis istoricamain prezius na s'impona betg, en vista als ulteriurs potenzials existents. Exempel d'in implant da fotovoltaica

Ulteriuras infurmaziuns: uffizi per il svilup dal territori

Infurmaziuns:
Erich Büsser, manader da l'uffizi d'energia e da traffic, tel. 081 257 36 21, e-mail Erich.Buesser@aev.gr.ch
Richard Atzmüller, manader da l'uffizi per il svilup dal territori, tel. 081 257 23 21, e-mail Richard.Atzmueller@are.gr.ch


Gremi: uffizi d'energia e da traffic / uffizi per il svilup dal territori
Funtauna: uffizi d'energia e da traffic / uffizi per il svilup dal territori