En ina brev a la cussegliera federala Simonetta Sommaruga pretenda la conferenza da las directuras e dals directurs chantunals da giustia e polizia da la Svizra orientala (CDCGP-ost) mesiras en il sectur d'asil.
Il secretariat da stadi per migraziun quinta per l'onn 2016 cun almain tuttina bleras novas dumondas d'asil sco l'onn 2015 (pia var 40 000). Ma ils svilups en il Proxim Orient ed en ils stadis africans na permettan betg ina prognosa exacta. Igl è tuttavia pussaivel che bler dapli requirentas e requirents d'asil pon arrivar en Svizra. Quest svilup è preoccupant. Bain èn ils chantuns da princip preparads per questa situaziun, els arrivan dentant als cunfins da lur capacitads. La conferenza da las directuras e dals directurs chantunals da giustia e polizia da la Svizra orientala (CDCGP-ost) pretenda perquai mesiras da la confederaziun.
Uschia ston las proceduras d'asil vegnir acceleradas cleramain per uschia reducir la durada da dimora da las requirentas e dals requirents d'asil en ils centers d'accoglientscha e da procedura da la confederaziun sco er en ils centers da transit chantunals. Urgentamain ston vegnir prendidas en mira ulteriuras cunvegnas da readmissiun, uschia che requirentas e requirents d'asil refusads pon vegnir expulsads svelt e decididamain. La confederaziun sto s'engaschar per che propi tut las requirentas ed ils requirents d'asil en il territori da Schengen vegnian registrads, per che la procedura da Dublin possia vegnir applitgada da maniera consequenta. La glista dals stadis segirs sto vegnir adattada a la glista dals stadis europeics.
En mintga cas sto vegnir impedida ina migraziun nuncontrollada. La CDCGP-ost pretenda che la confederaziun fetschia ina planisaziun correspundenta per situaziuns d'urgenza e ch'ella communitgeschia tala als chantuns, ch'èn medemamain pertutgads dals moviments da migraziun. Per mantegnair la segirezza pretenda ella ultra da quai en sia brev ch'il corp da guardias da cunfin (Cgcf) vegnia rinforzà pli marcantamain al cunfin da l'ost e dal nord da la Svizra e ch'il servetsch d'infurmaziun da la confederaziun (SIC) vegnia augmentà pli evidentamain.
Infurmaziuns:
Christian Rathgeb, president da la CDCGP-ost, tel. 081 257 25 01, e-mail: Christian.Rathgeb@djsg.gr.ch
Gremi: conferenza da las directuras e dals directurs chantunals da giustia e polizia da la Svizra orientala
Funtauna: rg conferenza da las directuras e dals directurs chantunals da giustia e polizia da la Svizra orientala