La cumissiun per politica da stadi e strategia propona al cussegl grond d'acceptar il relasch da la lescha da transparenza. Il cussegl grond vegn a tractar quest rapport en la sessiun da favrer 2016.

La cumissiun dal cussegl grond per politica da stadi e strategia ha predeliberà en duas sesidas la missiva da la regenza concernent il relasch d'ina lescha davart il princip da transparenza (lescha da transparenza). Quai sut la direcziun dal president da la cumissiun Maurizio Michael (Castasegna) ed en preschientscha dal cusseglier guvernativ Martin Jäger sco schef dal departament d'educaziun, cultura e protecziun da l'ambient.

Questa lescha duai reglar l'access a documents uffizials, sche quai vegn dumandà. Ella ha l'intent da promover la transparenza davart las activitads dals organs publics, e quai cun la finamira da facilitar la libra furmaziun da l'opiniun, il diever dals dretgs democratics e la controlla da l'agir dal stadi sco er da rinforzar la chapientscha e la confidenza da la populaziun envers ils organs publics. La cumissiun è entrada unanimamain en il project.
En la tractativa detagliada ha la minoritad da la cumissiun proponì che las vischnancas e las regiuns vegnian medemamain suttamessas a la lescha da transparenza. Sch'il cussegl grond acceptass questa proposta, stuessan – tenor la voluntad da la minoritad da la cumissiun – er las radunanzas communalas e las sesidas dals parlaments communals esser accessiblas a la publicitad. Dal rest è la cumissiun suandada per gronda part las propostas da la regenza.

La cumissiun propona al cussegl grond d'acceptar il relasch da la lescha da transparenza. Questa fatschenta vegn tractada en la sessiun da favrer 2016.


Infurmaziuns:
Maurizio Michael (Castasegna), president da la cumissiun per politica da stadi e strategia, tel. 079 798 90 92


Gremi: cumissiun per politica da stadi e strategia
Funtauna: rg cumissiun per politica da stadi e strategia