Er quest onn stoi vegnir fatg quint cun in grond dumber da requirents d'asil che vegnan attribuids al chantun Grischun. Per garantir las capacitads da collocaziun ch'èn necessarias per quai na po il chantun betg desister da las plazzas existentas. Perquai vegn prolungada l'incarica da prestaziun cun il gestiunari da l'alloschi da gruppas a Valchava, Val Müstair.

Cun l'alloschi da gruppas "Chasa Muntanella" è il november 2015 vegnida messa en funcziun a curta vista a Valchava in'ulteriura pussaivladad per collocar circa 50 requirents d'asil. Perquai ha la regenza grischuna fatg ina incarica da prestaziun cun il gestiunari dal bain immobigliar ch'era limitada per entant sin ils 30 d'avrigl 2016. Ultra da crear ulteriuras capacitads è er vegnida cuntanschida ina meglra repartiziun regiunala dals requirents d'asil.

Suenter ils emprims mais po tut en tut vegnir tratga ina bilantscha positiva da la collocaziun da requirents d'asil en la "Chasa Muntanella". Da quai ha il schef dal departament da giustia, segirezza e sanadad e president da la regenza Christian Rathgeb pudì sa persvader sez a chaschun d'ina visita al lieu il cumenzament d'avrigl 2016. Puncts averts ed aspectativas han pudì vegnir discutadas al lieu cun represchentants da la vischnanca da Val Müstair e cun ulteriuras organisaziuns da la vallada.

Perquai ch'i sto vegnir fatg quint ch'il dumber da requirents d'asil vegn a crescher er l'onn current, sto il Grischun pudair disponer vinavant d'alloschis adattads. Fin mez avrigl 2016 èn vegnids attribuids al chantun da nov gia circa 240 requirents d'asil. Per pudair garantir la capacitad d'accoglientscha e da collocaziun per novs requirents d'asil ch'èn gia qua u che vegnan spetgads, ston vegnir mess a disposiziun alloschis adattads. Perquai ha il chantun prolungà ad interim l'incarica da prestaziun cun il gestiunari da l'alloschi "Chasa Muntanella" a Valchava. L'uffizi da migraziun e da dretg civil vegn anc a designar là ina persuna da referiment.


Infurmaziuns:
- president da la regenza dr. Christian Rathgeb, schef dal departament da giustia, segirezza e sanadad, tel. 081 257 25 01, a partir da las 13.30
- Marcel Suter, manader da l'uffizi da migraziun e da dretg civil, tel. 081 257 25 21


Gremi: departament da giustia, segirezza e sanadad
Funtauna: rg departament da giustia, segirezza e sanadad