In nov sistem d'ovras da protecziun per la Val Parghera vegn a porscher segirezza a lunga vista. Grazia a la stretga collavuraziun da tut las parts participadas po il project da var 3 onns tranter Domat e Cuira vegnir prendì per mauns. Oz ha lieu l'emprima badigliada uffiziala.

Il pli tard dapi l'avrigl 2013 è daventada enconuschenta la bova da la Val Parghera. Quella giada èn plirs 100 000 meters cubic material vegnids giu da la val ed han sutterrà la via chantunala. Ussa survegn la bova in nov sistem d'ovras da protecziun. Quel duai porscher ina protecziun duraivla a lunga vista d'ina vart a la zona d'industria e da mastergn Paleu Sura e da l'autra vart als meds da traffic impurtants, sco la via chantunala vischina, la lingia da la Viafier retica e la via naziunala A13.

Cumbain che la bova è stada quieta ils ultims 2 onns, vegnan spetgadas er vinavant grondas quantitads da material or da l'intschess da la Val Parghera. Tenor stimaziuns è sa distatgada pir circa la mesadad da la surfatscha da bova activa. Cur ch'il material restant sa distatga e sche la bova arriva propi fin en la val, resta intschert. Ultra da la surfatscha da bova activa, èn er auters lieus vischins vegnids localisads sco surfatschas da bova pussaivlas, quai che augmenta supplementarmain il potenzial da privel. Tals process da privels da la natira ston vegnir prendids per mauns a lunga vista ed en moda cumplessiva. La protecziun duai esser concepida per eveniments ch'èn da spetgar ils proxims var 100 onns. Il potenzial da privel pretenda ch'i vegnian prendidas mesiras a temp e che quellas correspundian a las enconuschientschas las pli novas, per uschia pudair porscher ina protecziun duraivla. Consequenzas pussaivlas che resultassan en cas d'ina renunzia ad ina construcziun u en cas d'in sistem da protecziun restrenschì, na stessan en nagina relaziun cun ils custs actuals.

Il nov sistem d'ovras da protecziun cumpiglia mesiras a la tschima dal cugn, en l'aual ed a l'ur sut dal cugn da la Val Parghera. Il rempar satisfa a las grondas pretensiuns da segirezza, ed il mantegniment da l'ovra da protecziun vegn optimà tras in grond passagi. Il punct central è il nov collectur da gera sin l'autezza da la via chantunala. El ha in volumen da retenziun da circa 170 000 meters cubic (fin ussa 17 000 meters cubic), in'autezza da 10 meters ed in rempar da retenziun da 300 meters lunghezza. Sco terminaziun dal project èn planisadas recultivaziuns ed emplantaziuns cumpensatoricas intensivas per integrar las grondas ovra da construcziun da maniera uschè optimala sco pussaivel en il maletg da la cuntrada.

 

Il nov sistem d'ovras da protecziun per la Val Parghera

Plan da termins approximativ

Ulteriuras infurmaziuns: www.valparghera.ch


Infurmaziuns:
- cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01, e-mail: Mario.Cavigelli@bvfd.gr.ch
- manader regiunal Magnus Rageth, uffizi da guaud e privels da la natira, center regiunal Tumein, tel. 081 257 61 85, e-mail: Magnus.Rageth@awn.gr.ch


Gremi: uffizi da guaud e privels da la natira
Funtauna: rg uffizi da guaud e privels da la natira