L'uffizi da stimaziun e l'assicuranza d'edifizis dal Grischun duain collavurar pli fitg. Cun coordinar ils andaments dals manaschis duain vegnir reducids ils custs da las stimaziuns a favur da tut las parts pertutgadas (chantun, vischnancas, assicuranza d'edifizis, proprietarias e proprietaris da chasas). Per quest intent ha la regenza tramess en consultaziun ina revisiun parziala da la lescha davart l'assicuranza d'edifizis ed ina revisiun totala da la lescha davart las stimaziuns uffizialas.

L'assicuranza d'edifizis dal Grischun e l'uffizi da stimaziun han numerus puncts da colliaziun. Il schaner 2014 ha la regenza dà l'incumbensa d'analisar la valitaziun da bains immobigliars tras l'uffizi da stimaziun (USt) ed il sectur d'assicuranzas da l'assicuranza d'edifizis dal Grischun (GVG) sco er da concepir l'entir sistem en moda pli effizienta e pli favuraivla. L'analisa ch'è alura vegnida elavurada ha mussà il basegn d'agir correspundent. La part che pertutga la valitaziun da bains immobigliars vegn realisada a maun d'ina revisiun totala da la lescha davart las stimaziuns uffizialas. La part che pertutga l'assicuranza d'edifizis vegn prendida per mauns parallelamain en il rom d'ina revisiun parziala da la lescha davart l'assicuranza d'edifizis.

Il sboz da revisiun per la revisiun totala da la lescha davart las stimaziuns uffizialas cuntegna las suandantas finamiras ed ils suandants puncts essenzials:
- definir cleramain las incumbensas dal USt e pia sclerir ils puncts da colliaziun cun auters posts sco per exempel las vischnancas, l'assicuranza d'edifizis e l'administraziun da taglia;
- adattar il model dals custs e da las taxas resguardond pli fitg il princip da la cuvrida dals custs e da l'equivalenza;
- reducir l'obligaziun da valitaziun sin ils causals impurtants;
- simplifitgar ils meds legals;
- sustegnair cleramain ina structura organisatorica decentrala;
- adattar las noziuns e la sistematica da la lescha.
La lescha duai survegnir il nov num lescha davart las valitaziuns uffizialas d'immobiglias.

La revisiun parziala da la lescha davart l'assicuranza d'edifizis cuntegna ils suandants puncts centrals:
- las limitas per adattaziuns d'assicuranzas senza stimaziun duain vegnir adattadas vers ensi;
- l'assicuranza facultativa d'objects sumegliants ad edifizis e d'edifizis exceptads da l'obligaziun d'avair in'assicuranza tras la GVG duai vegnir abolida;
- la disposiziun, tenor la quala edifizis d'alp, stallas sco er chamonas ch'èn situads ordaifer in vitg e che han ina distanza da passa 100 meters dal proxim edifizi che sto esser assicurà, n'èn betg assicurads obligatoricamain, duai vegnir abolida;
- en cas d'edifizis existents en territoris da privel mellens ed en cas d'edifizis existents en zonas da privel blauas duain finanziaziuns d'impuls da l'assicuranza d'edifizis motivar las proprietarias ed ils proprietaris d'edifizis da prender mesiras preventivas cunter donns elementars (protecziun d'objects).

Tuttas duas consultaziuns duran fin ils 15 d'avrigl 2016.
Dals documents da consultaziun tar la revisiun parziala da la lescha davart l'assicuranza d'edifizis pon ins prender invista en l'internet sut www.gr.ch (Consultaziuns currentas / DGSS).
Dals documents da consultaziun tar la revisiun totala da la lescha davart las stimaziuns uffizialas pon ins prender invista en l'internet sut www.gr.ch (Consultaziuns currentas / DFV).


Infurmaziuns:
- cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01
- president da la regenza dr. Christian Rathgeb, schef dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun