Il chantun ha inoltrà la dumonda da construcziun per in nov center d'administraziun a Cuira vest. Perquai che la citad ha integrà in'obligaziun da construir garaschas sutterranas en la procedura dal plan d'areal e da quartier, sto la gronda part da las plazzas da parcar vegnir messa sut terra gia en l'emprima etappa da construcziun dal project. Questa nova prescripziun chaschuna custs supplementars da circa 3,5 milliuns francs per l'etappa 1.

En la sessiun d'october 2011 aveva il cussegl grond approvà l'etappa 1 per la construcziun d'in nov center administrativ chantunal cun var 400 plazzas da lavur a Cuira e concedì in credit d'impegn brut da 69 milliuns francs sin basa d'ina planisaziun da test. En la votaziun dals 11 da mars 2012 ha la maioritad dal pievel grischun acceptà il project "sinergia". En concordanza cun la legislaziun da construcziun da la citad prevesa il project da test en emprima lingia plazzas da parcar sur terra. Sin basa da quai è lura vegnida fatga ina concurrenza publica da planisaziun, ed il project victur dal biros d'architectura Jüngling e Hagmann, Cuira, e vegnì sviluppà vinavant.

La procedura dal plan d'areal Cuira vest influenzescha il plan da quartier "sinergia"
Pervia dal grond interess da realisar ulteriurs projects da chasas autas en il territori Cuira vest ha la suprastanza da la citad da Cuira concludì il december 2014 d'instradar ina procedura dal plan d'areal. Tenor las disposiziuns dal plan d'areal duain ils vehichels parcads vegnir dischlocads en quest connex sut terra per augmentar la qualitad da vita. Sur terra dastgan vegnir offridas mo pli plazzas da parcar per visitaders e per taxis. Il plan da quartier per il project "sinergia", che la suprastanza da la citad da Cuira ha relaschà en sia ultima sesida dals 17 da matg 2016, resguarda quest interess urbanistic e prevesa ussa perquai medemamain in'obligaziun da construir garaschas sutterranas. Relaschond il plan da quartier ha la suprastanza da la citad da Cuira er refusà duas protestas.

La garascha sutterrana pli gronda en l'etappa 1 chaschuna adattaziuns dal project
Perquai che las plazzas da parcar ston vegnir messas sut terra, ha stuì vegnir repassà parzialmain il project da construcziun ch'è resortì d'ina procedura da concurrenza. Cuntrari a la planisaziun oriunda cun 42 plazzas da parcar sutterranas ston ussa totalmain 105 da las 150 plazzas da parcar vegnir construidas sut terra en il rom da l'emprima etappa.

Suenter avair examinà differentas variantas da realisaziun ha il team da planisaders generals pudì chattar ina soluziun che n'influenzescha betg memia fitg il project existent e che na retardescha betg fundamentalmain l'andament da las lavurs da construcziun. La garascha sutterrana ch'è la finala vegnida integrada en il project da construcziun ha ina volumetria cumpacta ed ina simpla organisaziun areguard la funcziun ed il manaschi. Ella è situada cumplainamain sin il segund plaun sutterran. Las expensas supplementaras budgetadas per quest intent importan 3,5 milliuns francs.

Ord vista dal dretg da finanzas èn cuvridas las expensas supplementaras per la halla da parcar
Il credit d'impegn da 69 milliuns francs ch'è vegnì concedì dal pievel grischun, na basta ord vista actuala betg per cuvrir ils custs supplementars da ca. 3,5 milliuns francs per la garascha sutterrana engrondida. Tenor in'expertisa giuridica externa èn quests custs supplementars expensas supplementaras betg previsiblas, prescrittas tras lescha. Cur ch'il pievel grischun ha approvà il credit d'impegn ils 11 da mars 2012, n'existiva nagina obligaziun da construir garaschas sutterranas ed i n'era er betg previsibel ch'ina tala obligaziun vegnia introducida. Questa obligaziun è vegnida relaschada da nov sin il stgalim da la lescha en il decurs da l'onn 2015 tras la citad da Cuira sco autoritad da construcziun cumpetenta. Perquai che questas expensas supplementaras n'eran betg previsiblas, na stoi damai betg vegnir dumandà in credit supplementar tenor la legislaziun chantunala da finanzas, ed ellas vegnan concludidas dal cussegl grond en il rom dal preventiv.

Independentamain da la dumonda co che las expensas supplementaras vegnan qualifitgadas areguard il dretg da finanzas, vegn l'uffizi da construcziun auta ad examinar – sco tar tut ils projects da construcziun dal chantun – eventuals potenzials da spargn en il rom da l'ulteriur decurs dal project e vegn sche pussaivel a realisar tals.

Il chantun e la citad da Cuira vulan che las lavurs da construcziun cumenzian proximamain
La soluziun che la dumonda da construcziun prevesa per ordinar las plazzas da parcar è vegnida sviluppada ils ultims mais en in dialog permanent tranter las autoritads chantunalas e municipalas. Grazia al fatg che la citad da Cuira ha empermess da tractar en moda speditiva la dumonda da construcziun ch'è gia vegnida examinada preliminarmain, pon ins – cun resalva d'eventualas proceduras da meds legals – far quint che la permissiun da construcziun vegnia concedida anc avant las vacanzas da stad. En quest cas fissi pussaivel da publitgar anc quest onn las emprimas lavurs da quest project da construcziun ch'è da gronda impurtanza per l'economia regiunala. Las lavurs da construcziun pudessan cumenzar la primavaira 2017.


Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail: Mario.Cavigelli@bvfd.gr.ch


Gremi: regenza
Funtauna: rg chanzlia chantunala dal Grischun