La lescha federala davart las abitaziuns secundaras (LAS) ch'è entrada en vigur il 1. da schaner 2016 cuntegna bleras dumondas d'interpretaziun difficilas ed avertas. Perquai ha il departament d'economia publica e fatgs socials elavurà in agid d'execuziun.

Cun in agid d'execuziun vul il departament d'economia publica e fatgs socials (DES) gidar las vischnancas ch'èn pertutgadas da la lescha davart las abitaziuns secundaras ad applitgar ed ad interpretar il relasch en la procedura per la permissiun da construcziun. Il document cuntegna respostas ed exempels concrets per las dumondas d'applicaziun las pli urgentas e las pli frequentas en la pratica da permissiun da mintga di, e duai en quest senn gidar a facilitar l'execuziun en las vischnancas pertutgadas.

Quest agid d'execuziun cuntegna recumandaziuns d'applicaziun provisoricas dal departament per mauns da las autoritads communalas. El vala fin ch'ina pratica da dretgira confermada è avant maun. Cumpetentas e responsablas èn e restan las vischnancas ch'èn obligadas envers la lescha ed envers las sentenzias giudizialas en chaussa. Igl è previs d'adattar il document periodicamain a las novas enconuschientschas ed a las novas sentenzias giudizialas.

Il departament d'economia publica e fatgs socials ha la surveglianza davart l'execuziun da la legislaziun davart las abitaziuns secundaras. Cun elavurar questas recumandaziuns vul il DES gidar – sco ulteriura finamira – a cuntanscher in'applicaziun dal dretg uschè unitara sco pussaivel en il chantun.

Il document sa drizza a vischnancas cun ina quota d'abitaziuns secundaras da dapli che 20 pertschient ed a talas che cuntanschan prest quest cunfin. Ultra da quai duai el facilitar ad ulteriurs interessents – sco patruns da construcziun ed architects – d'elavurar projects da construcziun. L'agid d'execuziun vegn tramess a las vischnancas pertutgadas e po vegnir consultà sin la pagina d'internet dal departament.


Infurmaziuns:
Bruno Maranta, secretari dal departament d'economia publica e fatgs socials, tel. 081 257 23 11, e-mail: Bruno.Maranta@dvs.gr.ch


Gremi: departament d'economia publica e fatgs socials
Funtauna: rg departament d'economia publica e fatgs socials