La regenza ha prendì posiziun tar la politica dal clima da la Svizra suenter l'onn 2020, ha relaschà ina regulaziun cumpensatorica per l'incassament da taxas d'aua persa per la citad da Cuira ed ha approvà las revisiuns da las planisaziuns localas da las vischnancas da Tumein e da Bregaglia.

Posiziun tar la politica dal clima da la Svizra suenter l'onn 2020
La regenza ha prendì posiziun tar la politica dal clima da la Svizra suenter l'onn 2020. En il rom da questa consultaziun da la confederaziun vegnan mess en discussiun trais projects che han ina stretga colliaziun tematica in cun l'auter: la cunvegna da Paris, la cunvegna bilaterala cun la UE davart la colliaziun dals sistems da commerzi d'emissiuns e la revisiun totala da la lescha da CO₂ per il temp suenter l'onn 2020.
La regenza grischuna sustegna la ratificaziun da la cunvegna da Paris tras la Svizra. Per che la Svizra possia collavurar decisivamain tar la concepziun da la cunvegna, sto quella vegnir ratifitgada bainbaud.
La colliaziun dals sistems da commerzi d'emissiuns da la Svizra cun la UE beneventa la regenza da princip. En quest connex ston però vegnir fatgas adattaziuns per resguardar las finamiras da reducziun naziunalas, per attribuir ils dretgs gratuits d’emissiun, per integrar il traffic aviatic e las ovras electricas fossil-termicas.
Tar la lescha da CO₂ approvescha la regenza la finamira da reducziun da 50 pertschient fin l'onn 2030 envers l'onn 1990. La cumpensaziun en Svizra ed a l'exteriur na dastga però betg vegnir prescritta. La limitaziun temporara dal program d'edifizis approvescha la regenza, ma ella refusa in scumond da stgaudaments fossils. Sco alternativa ston vegnir fixads impuls en il dretg fiscal. Per reducir la chargia unilaterala en il sectur d'edifizis duain las pretensiuns al traffic fin ussa discretas vegnir augmentadas cleramain ed i duain vegnir pretendidas ulteriuras mesiras sin il stgalim da la lescha. Ultra da quai ston vegnir resguardadas en la lescha da CO₂ mesiras da reducziun centralas en l'agricultura.

Posiziun da la regenza dal Grischun

Regulaziun cumpensatorica per l'incassament da taxas d'aua persa per la citad da Cuira
La regenza ha relaschà per la citad da Cuira ina regulaziun cumpensatorica per l'incassament da taxas d'aua persa che cuvran ils custs e che correspundan al princip dal chaschunader. Quella vegn messa en vigur per il 1. da schaner 2017 e prevesa d'augmentar la taxa tenor quantitad per 60 raps sin 1.35 francs per meter cubic aua retratga.
Igl è l'incumbensa da la vischnanca d'incassar dals chaschunaders contribuziuns e taxas che cuvran ils custs e che correspundan al princip dal chaschunader per la construcziun, la gestiun, il mantegniment, la sanaziun ed il remplazzament da stabiliments d'aua persa publics. La taxa tenor quantitad che la citad da Cuira incassescha na cuvra gia dapi blers onns betg ils custs e na correspunda er betg al princip dal chaschunader. Uschia ston ils custs per ils stabiliments d'aua persa vegnir finanziads per part cun meds fiscals generals. En spezial vegnan ils custs per il mantegniment e per l'engrondiment da la rait da chanalisaziun da la citad actualmain cuvrids per gronda part cun meds fiscals. Perquai na correspundan las disposiziuns communalas da la citad da Cuira concernent la finanziaziun dals stabiliments d'aua persa betg al dretg surordinà. Durant ils onns passads ha la suprastanza da la citad da Cuira inizià diversas giadas senza success pass per introducir ina meglra basa legala per incassar taxas d'aua persa che correspundan a la lescha e per auzar las taxas. Sch'ina vischnanca n'è betg en cas d'incassar taxas d'aua persa confurmas al dretg federal è la regenza obligada d'intervegnir. Quai vul dir che la regenza relascha empè da la citad da Cuira ina regulaziun da taxas che correspunda a la lescha.

La regenza s'exprima cunter la lescha davart interpresas da mastergnanza dal chantun Tessin
La regenza grischuna ha supplitgà la regenza tessinaisa da remplazzar la lescha davart interpresas da mastergnanza (legge sulle imprese artigianali, LIA) tras ina regulaziun ch'è cumpatibla cun il concept economic liberal da noss pajais. La LIA pretenda che differentas cundiziuns vegnian ademplidas cun inoltrar differents documents sco per exempel in extract dal register da commerzi, in extract dal register penal dal possessur dal manaschi e dal mainagestiun, extracts dal register da scussiun, attests d'assicuranza, diploms e certificats professiunals. Ultra da quai vegnan incassadas taxas per l'emprima registraziun sco er per la controlla tecnica da las enconuschientschas professiunalas e taxas periodicas annualas per actualisar il register. La regenza è conscienta che questas mesiras na sa drizzan betg cunter interpresas svizras, mabain servan a reducir l'access da manaschis talians che tramettan lur lavurants en Svizra e che concurrenzeschan uschia fitg ferm las interpresas indigenas. En vista a las differenzas tar ils salaris e tar ils pretschs cun l'Italia vischina sa chatta il chantun Tessin en ina situaziun fitg difficila. Tuttina è la LIA che na pertutga betg mo interpresas talianas, mabain er svizras – inclusivamain tessinaisas – la faussa via. La LIA tanghescha valurs fundamentalas da nossa convivenza economica sco per exempel la concurrenza faira, la confidenza vicendaivla, la buna fai sco er l'acceptanza vicendaivla.

Approvà la planisaziun per midar la plazza communala da Tumein
La revisiun parziala da la planisaziun locala, ch'è vegnida concludida ils 14 da settember 2016 da la vischnanca da Tumein, vegn approvada da la regenza. La finamira da la revisiun parziala è da midar la plazza communala da Tumein. Actualmain sa preschenta la plazza sco surfatscha da traffic cun plazzas da parcar. Cun concepir da nov la plazza communala duai vegnir augmentada la valur da quella sco center dal vitg cun ina gronda qualitad da trategniment. Tranter auter duai vegnir construì da la vart nord da la plazza in nov edifizi cun ina garascha sutterrana al lieu d'ina stalla veglia. In'utilisaziun publica dal plaunterren duai dar vita a la plazza. Quella vegn er accentuada architectonicamain cun structurar il sochel, che dat vers la plazza, cun arcadas.

© schneller caminada architekten

Bregaglia vuless construir in manaschi d'explotaziun e da deponia
La regenza ha approvà la revisiun parziala da la planisaziun locala da la vischnanca da Bregaglia e stgaffescha uschia las premissas da la planisaziun d'utilisaziun per avrir in manaschi d'explotaziun e da deponia vi da l'Abigna en vischinanza da la fracziun "Pranzaira" (anteriura vischnanca da Vicosoprano). En vista a la grondezza resp. a la relevanza considerabla ch'il project ha per il spazi è vegnida fatga ina planisaziun directiva. La regenza ha approvà l'adattaziun dal plan directiv regiunal da la vischnanca da Bregaglia ed ha concludì ultra da quai ch'il plan directiv chantunal vegnia adattà.

© Comet Photoshopping GmbH / Dieter Enz

Entrada en vigur da l'ordinaziun chantunala da chatscha
La revisiun parziala da l'ordinaziun chantunala da chatscha dals 18 d'october 2016 vegn messa en vigur per il 1. da december 2016. Cun la revisiun parziala vegn stgaffida la premissa per indemnisar donns da selvaschina. Indemnisaziuns per donns da spezias da selvaschina protegidas paja la confederaziun mo, sch'il chantun surpiglia ils custs restants. Uschia po il chantun indemnisar en il futur – ultra dals donns chaschunads da las spezias da selvaschina protegidas luf-tscherver, evla, urs e luf – da nov er ils donns dals casturs e da las ludras (50 pertschient dals custs dals donns) sco er dals schacals mellens (80 pertschient dals custs dals donns).


Gremi: regenza
Funtauna: rg chanzlia chantunala dal Grischun