La regenza ha deliberà la missiva tar la revisiun parziala da la lescha davart las taglias communalas e davart las taglias da baselgia per mauns dal cussegl grond. Da nov duain er las persunas domiciliadas al lieu pajar ina taxa da giasts, sch'ellas possedan en la medema vischnanca ina immobiglia da vacanzas ch'ellas dovran sezzas.

Praticamain tut las vischnancas incasseschan ina taxa da cura resp. ina taxa da giasts. Ils princips da questa taglia sa chattan en la lescha chantunala davart las taglias communalas e davart las taglias da baselgia. Concretisada vegn questa taglia mintgamai en la lescha communala da turissem.

Il subject da la taxa da giasts è il giast che pernottescha. Exceptadas da l'obligaziun da pajar ina taxa da giasts èn las persunas domiciliadas al lieu. Quai èn quellas persunas che han lur domicil fiscal en la vischnanca respectiva resp. ch'èn obligadas da pajar illimitadamain taglia là. Concretamain vul quai dir il suandant: Las persunas che sa trategnan per intents da vacanzas en lur atgna immobiglia da vacanzas (proprietaris da segundas abitaziuns) èn suttamessas a l'obligaziun da pajar ina taxa da giasts, sch'ellas n'han betg in domicil fiscal en la vischnanca respectiva. Betg pajar questa taxa na ston percunter quellas persunas che sa trategnan medemamain per intents da vacanzas en lur atgna immobiglia da vacanzas, ma che abitan en la medema vischnanca. Il tractament different tranter persunas domiciliadas al lieu e persunas betg dal lieu na va betg a prà cun la prescripziun da l'egualitad giuridica, e quai tenor ina sentenzia dal tribunal federal concernent il chantun Sursilvania e tenor ina sentenzia da la dretgira administrativa dal chantun Sviz. La pussaivladad da far diever dals indrizs turistics na dependa tenor questas dretgiras betg dal lieu da domicil. Sin fundament da questa giurisdicziun exista – tenor l'avis da la regenza – in basegn d'agir.

Per evitar che mintga vischnanca stoppia adattar sia lescha communala da turissem ha la regenza concludì da reveder la lescha davart las taglias communalas e davart las taglias da baselgia. Da nov duain esser suttamessas a la taxa da giasts er tut las persunas domiciliadas al lieu che possedan ina immobiglia da vacanzas utilisada sez en la medema vischnanca. In'excepziun datti mo, sche la vischnanca paja ina contribuziun essenziala al svilup dal turissem or da las taglias sin las entradas e sin la facultad da las persunas domiciliadas al lieu. La nova disposiziun da la lescha davart las taglias communalas e davart las taglias da baselgia duai vegnir applitgada directamain per las vischnancas. Questa soluziun è en l'interess da las vischnancas e po vegnir realisada svelt ed en moda simpla ed effizienta. Persunas domiciliadas al lieu senza ina immobiglia da vacanzas utilisada sez en la medema vischnanca èn er en l'avegnir liberadas da l'obligaziun da pajar ina taxa da giasts.
Il cussegl grond vegn a tractar il project en la sessiun da december 2017.

Agiunta:
missiva


Infurmaziuns:
- presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, E-Mail Barbara.Janom@dfg.gr.ch
- dr. iur. Toni Hess, manader dal servetsch giuridic da l'administraziun da taglia, tel. 081 257 33 26, E-Mail Toni.Hess@stv.gr.ch


Gremi: regenza
Funtauna: rg chanzlia chantunala dal Grischun