Pervia dal grond privel d'incendis da cultira e da guaud relascha l'uffizi da guaud e privels da la natira in scumond absolut da far fieu en il guaud ed en la vischinanza dal guaud.

Il scumond absolut da far fieu en il guaud ed en la vischinanza dal guaud vala en la Val dal Rain da Cuira, en il Partenz, en il Scanvetg, en la regiun Mantogna / Tumleastga, en il Grischun central, en la regiun Schons / Alvra, en Valragn ed en Surselva. En las vals dal Grischun dal sid è – sco en il chantun Tessin – en vigur in scumond absolut da far fieu al liber gia dapi ils 9 da fanadur 2018 pervia da la setgira fitg derasada. Betg pertutgads dal scumond n'èn per entant l'Engiadina bassa, l'Engiadin'ota, la Val Müstair, il Samignun e la regiun Tavau – Claustra. La situaziun vegn giuditgada cuntinuadamain ed il scumond vegn – sche necessari – extendì sin ulteriurs territoris.

Per ils proxims dis vegn puspè prognostitgada in'aura da stad fitg chauda. Pervia da quai crescha il privel d'incendis da guaud e da cultira anc ina giada. Dapi pliras emnas n'hai dà pli nagina plievgia intensiva. Ultra da quai han la bella aura da stad ed ils dis da bler vent setgentà fermamain ils terrens dals guauds e la bostgaglia. Sut questas cundiziuns pon fieus daventar facilmain nuncontrollabels e sa derasar fitg svelt.

Pervia dal privel acut d'incendis da guaud èsi scumandà absolutamain da far fieu en il guaud ed en la vischinanza dal guaud en las regiuns pertutgadas. Products da fimar e battafieus na dastgan betg simplamain vegnir bittads davent. Tut las plazzas da grillar en ils guauds ed en la vischinanza dals guauds na dastgan betg vegnir duvradas.

Che la situaziun sa mitigeschia, dastga vegnir spetgà pir suenter plievgias intensivas. Quantitads da plievgia pli pitschnas sco urizis d'ina u da duas uras u ina leva plievgia na cuntanschan – pervia dal tetg da tschimas – betg il funs dal guaud e na pon uschia betg mitigiar duraivlamain la situaziun.

En vista al 1. d'avust ston las ordinaziuns da las autoritads communalas e dals pumpiers vegnir observadas strictamain.

Ulteriuras infurmaziuns sco er la valitaziun da la situaziun actuala sut:
Uffizi da guaud e privels da la natira


Infurmaziuns:
Andrea Kaltenbrunner, uffizi da guaud e privels da la natira, tel. 081 257 38 68, e-mail Andrea.Kaltenbrunner@awn.gr.ch 


Gremi: uffizi da guaud e privels da la natira
Funtauna: rg uffizi da guaud e privels da la natira