Per reducir cas da direzza economics ha il chantun endrizzà in fond per cas da direzza da 10 milliuns francs. L'agid duai servir ad interpresas pitschnas cun ina svieuta annuala da maximalmain 2,5 milliuns francs.

Cun differentas mesiras – sco indemnisaziuns per lavur reducida, indemnisaziuns da la perdita da gudogn ed agids da liquiditad – han la Confederaziun ed il chantun cumbattì cunter las consequenzas economicas negativas considerablas che resultan pervia da las mesiras che las autoritads han ordinà per cumbatter il coronavirus. Pervia da circumstanzas manaschialas particularas na vegnan questas mesiras tuttina betg a bastar per tschertas interpresas, e per differents motivs èn intginas interpresas pertutgadas d'ina direzza spezialmain greva en cumparegliaziun cun autras interpresas.

Fin a 30 000 francs per interpresas pertutgadas spezialmain fitg
Per reducir cas da direzza economics ha la Regenza endrizzà in fond per cas da direzza da 10 milliuns francs e relaschà in'ordinaziun correspundenta. Interpresas ch'èn pertutgadas spezialmain fitg da las mesiras uffizialas per cumbatter il coronavirus vegnan sustegnidas per quest intent cun contribuziuns à fonds perdu.

L'agid duai servir ad interpresas pitschnas che han lur sedia en il Grischun, che han ina svieuta annuala da maximalmain 2,5 milliuns francs e che cumportan da princip main bain perditas dal retgav u han damain pussaivladads per superar temps da crisa. La contribuziun maximala è limitada a 30 000 francs per cas singul. Ina interpresa sto render vardaivel, pertge ch'ella è pertutgada spezialmain fitg.

Fond per cas da direzza sco cumplettaziun da las ulteriuras mesiras da sustegn
Il sustegn è subsidiar tar autras mesiras da sustegn da la Confederaziun e dal chantun u tar autras prestaziuns d'assicuranzas. Uschia sto l'interpresa gia avair fatg valair ina indemnisaziun per lavur reducida e/u ina indemnisaziun da la perdita da gudogn sco er fatg diever dals agids da liquiditad disponibels, sco ils credits COVID-19. Il fond per cas da direzza vegn en funcziun, sche las mesiras da sustegn da la Confederaziun e dal chantun sco er las ulteriuras mesiras pussaivlas che l'interpresa ha prendì per sminuir las perditas na bastan betg per reducir suffizientamain ses donn economic en consequenza da las mesiras uffizialas per cumbatter il coronavirus.

Las dumondas ston vegnir inoltradas fin ils 31 da fanadur 2020. Las infurmaziuns ed ils documents ch'èn necessaris per far la dumonda stattan a disposiziun a partir da glindesdi, ils 8 da zercladur 2020, sin la pagina d'internet dal Departament d'economia publica e fatgs socials.

Per endrizzar il fond per cas da direzza da 10 milliuns francs dovri in credit posteriur da questa dimensiun per il preventiv 2020. Correspundentamain po il fond per cas da direzza vegnir endrizzà mo cun la resalva d'ina decisiun positiva da la Cumissiun da gestiun dal Cussegl grond, ch'è cumpetenta per conceder credits posteriurs.

Agiunta:
Ordinaziun

Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e-mail Marcus.Caduff@dvs.gr.ch

Gremi: Regenza
Funtauna: rg Chanzlia chantunala