Las explicaziuns dal Cussegl grond per la votaziun chantunala dal pievel dals 13 da zercladur 2021 cumparan per l'emprima giada en in nov layout. Cun la nova concepziun ha la Cumissiun da redacziun dal Cussegl grond persequità la finamira da render las explicaziuns da votaziun pli interessantas e d'augmentar la legibladad.
Las explicaziuns da votaziun èn in instrument central da la democrazia, perquai ch'ellas pussibiliteschan a las votantas ed als votants da chapir il cuntegn ed ils effects da projects da votaziun e da furmar in'opiniun en chaussa. Quai funcziuna dentant mo, sche la broschura da votaziun è er in invit da leger – pia sch'ella ha in'apparientscha moderna ed in cuntegn cun ina structura clera, survesaivla e bain chapibla. Perquai ch'il vestgì da las explicaziuns chantunalas da votaziun d'enfin ussa era in pau antiquà, ha la Cumissiun da redacziun concludì d'al reveder da maniera cumplessiva. Sco agid d'orientaziun ha servì la broschura da votaziun da la Confederaziun.
"Curtamain" e "Detagls"
Confurm al spiert dal temp duai ina structura da duas parts pussibilitar svelt e precis a tut las votantas e votants da furmar l'atgna opiniun en moda objectiva, neutrala ed equilibrada. A la lectura u al lectur che ha prescha vegnan da nov preschentads en in'emprima part sin ina pagina dubla (titulada cun "Curtamain") tut ils projects, inclusiv la dumonda da votaziun e las recumandaziuns dal Cussegl grond (ed eventualmain dal comité d'iniziativa u da referendum). Tgi che vul s'approfundar en l'object da votaziun, chatta las infurmaziuns en la part principala (titulada cun "Detagls"), nua che la situaziun da partenza, l'intent e las consequenzas dals projects vegnan explitgads detagliadamain. Cumplettà vegn quest chapitel cun ils arguments dal Cussegl grond (inclusiv tals d'ina minoritad considerabla dal cussegl) ed eventualmain cun ils arguments dal comité d'iniziativa u da referendum.
"Lingua simpla" empè da lingua administrativa
Mo ina nova apparientscha u ina clera structura na bastan anc betg per facilitar a la lectura u al lectur l'access a las explicaziuns da votaziun. Impurtant èsi ch'ils temas da votaziun – ch'èn savens cumplexs – vegnian explitgads en ina lingua ch'è chapibla per tut las votantas ed ils votants. Perquai ha la Cumissiun da redacziun relaschà ina directiva redacziunala che duai instruir ils departaments ed ils comités da formular lur texts per la broschura en ina moda generalmain chapibla. Natiralmain cumparan las explicaziuns da votaziun er en l'avegnir en tut las trais linguas chantunalas.
Las explicaziuns per la votaziun chantunala dal pievel dals 13 da zercladur 2021 cumparan ussa per l'emprima giada en il nov vestgì. A partir dals 17 da matg 2021 tramettan las vischnancas las explicaziuns a las votantas ed als votants.
Agiunta:
explicaziuns per la votaziun chantunala dal pievel dals 13 da zercladur 2021
Infurmaziuns:
president dal Cussegl grond Martin Wieland, tel. +41 79 799 61 15
Gremi: Cumissiun da redacziun
Funtauna: rg Cumissiun da redacziun