Dapli pliras emnas n'hai dà naginas precipitaziuns pli grondas pli al sid da las Alps. Las prognosas da l'aura per ils proxims dis n'annunzian betg ina meglieraziun da la setgira al sid. Perquai ch'igl è stà dapi emnas bell'aura e perquai ch'il vent dal nord è mintgatant stà ferm, vala per la Mesolcina, la Val Calanca, il Puschlav e la Bregaglia sco er per l'entir chantun Tessin gia dapi ils 13 da schaner 2022 in scumond absolut da far fieu al liber.
La situaziun al sid da las Alps è precara: In grond incendi da guaud al Monte Gambarogno (TI), chaschunà tras in fieu al liber ch'era vegnì envidà per negligientscha e betg stizzà correctamain, han ins dumagnà sut controlla pir suenter plirs dis. En las regiuns dal sid èsi perquai scumandà gia dapi var in mais da far fieu al liber. Products da fimar na dastgan betg vegnir bittads davent malprecautamain. Che la situaziun sa mitigeschia, dastga vegnir spetgà pir suenter plievgias intensivas da plirs dis. Pitschnas quantitads da plievgia u ina leva plievgia permanenta na pon betg meglierar duraivlamain la situaziun.
Attenziun er al nord
Al nord da las Alps dal Grischun sco er en l'Engiadina ed en la Val Müstair exista per il mument per gronda part anc in pitschen privel d'incendis da guaud e da cultira. En questa stagiun èn l'autezza sur mar, eventualmain la cuverta da naiv e cunzunt l'exposiziun facturs decisivs per il stgalim dal privel d'incendis da guaud. En lieus senza naiv ch'èn exponids al sulegl po vegnir cuntanschì – durant suentermezdis chauds – il stgalim «moderà» dal privel d'incendis da guaud. Fieus per grillar duain vegnir envidads cun gronda precauziun e da preferenza en fuclar fixs. Cunzunt sch'i sufla sco er en lieus nua ch'igl ha feglia setga sco er pastg e chagliom setg, ston ils fieus vegnir survegliads permanentamain. Ils fuclars dastgan vegnir bandunads pir, suenter ch'il fieu è stizzà cumplettamain. En cas da ferm vent na duai insumma betg vegnir fatg fieu al liber. In fieu rut ora en cas da ferm vent po sa derasar fitg svelt. Products da fimar e battafieus na dastgan mai vegnir bittads davent malprecautamain.
Ulteriuras infurmaziuns e la valitaziun da la situaziun actuala stattan a disposiziun sin la pagina d'internet da l'Uffizi da guaud e privels da la natira.
Infurmaziuns:
Andrea Kaltenbrunner, Surveglianza dal guaud, Uffizi da guaud e privels da la natira, tel. +41 81 257 38 68, e-mail Andrea.Kaltenbrunner@awn.gr.ch
Responsabladad: Uffizi da guaud e privels da la natira