Smanatschas ed insultas na vegnan betg toleradas en il cumbat electoral en il Grischun. Il president da la Regenza, Peter Peyer, appellescha da manar cun respect ed onestadad il cumbat electoral per las elecziuns naziunalas dals 22 d'october 2023. Las candidatas ed ils candidats che vegnan smanatschads u insultads, durant ch'els fan diever da lur dretgs politics, pon far ina denunzia tar la Polizia chantunala u tar la Procura publica.

Ils 22 d'october 2023 han lieu las elecziuns federalas. Il pievel svizzer po far diever libramain dal dretg d'eleger passiv ed activ. «Quest progress central sto vegnir protegì», di il president da la Regenza Peter Peyer. Displaschaivlamain capiti dentant adina puspè, che persunas che candideschan per in uffizi, vegnan smanatschadas u insultadas. Perquai ha il Departament da giustia, segirezza e sanadad scrit a las partidas grischunas, per render attentas las candidatas ed ils candidats a lur dretgs. Sche talas e tals èn pertutgads d'acziuns inacceptablas, sco smanatschas ed insultas, en spezial en las medias socialas, pon ellas ed els far ina denunzia.

Dal rest èsi uschia, che nagin na sto simplamain acceptar disfamaziuns u schizunt attatgas persunalas. Igl è pussaivel d'annunziar tals incidents a la polizia u a la Procura publica. «Mails instigants, smanatschas en las medias socialas, cybermobing e chaussas sumegliantas na dastgan betg vegnir tolerads en ina societad che tracta umans cun respect», exprima Peter Peyer.

Infurmaziuns:

President da la Regenza Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 15.00 fin las 17.00), e‑mail Peter.Peyer@djsg.gr.ch

Responsabladad: Departament da giustia, segirezza e sanadad