La Regenza ha approvà in project voluminus per reparar e meglierar la correcziun da la Fedacla en la Val Fex. Ultra da quai ha ella deliberà ina contribuziun chantunala per renovar la chamona da Carschina CAS.
Sanaziun da la gallaria da distgargia da la Fedacla
La Regenza ha dà glisch verda ad in project voluminus per reparar e meglierar la correcziun da la Fedacla en la vischnanca da Segl. Ils custs totals, ch'èn budgetads cun 4,2 milliuns francs, vegnan subvenziunads tras contribuziuns federalas e chantunalas per la correcziun da curs d'aua. Tenor la cunvegna da program da la Nova gulivaziun da finanzas (NGF) surpiglian la Confederaziun ed il chantun ensemen 1,47 milliuns francs. Plinavant surpiglia il chantun ulteriurs 840 000 francs dals custs totals imputabels dal project, quai tenor la Lescha davart la correcziun dals curs d'aua.
L'affluent dal Lai da Silvaplauna percurra l'entira Val Fex e deviescha l'aua d'in intschess da stgars 34 kilometers quadrat. Durant il tschientaner passà èn la Val Fex e l'abitadi da Segl vegnids tutgads pliras giadas d'auas grondas. Suenter ch'i n'è betg gartegià da cumbatter ils eveniments donnegiants tras differentas correcziuns dal flum, han ins la finala decidì l'onn 1969 da construir ina gallaria da distgargia d'ina lunghezza da var 500 meters. En cas d'in eveniment po ina part da l'aua gronda vegnir deviada dapi lura dal curs dal flum sur l'abitadi da Segl e manada tras la gallaria directamain en il Lai da Segl. Quest entir sistem da correcziun è da princip sa cumprovà en il passà. Ils abitadis ed ils stabiliments d'infrastructura en ils conturns èn per il solit vegnids schanegiads da donns. En il rom da controllas da las ovras èsi però sa mussà, ch'ina part da las correcziuns existentas è donnegiada. In'analisa pli detagliada ha plinavant mussà, che las correcziuns ston vegnir rinforzadas e cumplettadas en differents lieus per ademplir las pretensiuns odiernas a la segirezza.
La Regenza ha dà glisch verda ad in project voluminus per reparar e meglierar la correcziun da la Fedacla en la vischnanca da Segl. Ils custs totals, ch'èn budgetads cun 4,2 milliuns francs, vegnan subvenziunads tras contribuziuns federalas e chantunalas per la correcziun da curs d'aua.
La chamona da Carschina CAS sut la Sulzfluh vegn sanada
La Regenza ha concedì a la secziun Rätia dal Club alpin svizzer (CAS) ina contribuziun da maximalmain 200 000 francs or da la finanziaziun speziala Sport per renovar la chamona da Carschina CAS. Ils custs totals da la renovaziun èn budgetads cun var 2,65 milliuns francs. Gia il december aveva la Regenza garantì a la secziun Rätia dal CAS ses sustegn finanzial per renovar la chamona da Carschina CAS, quai en il rom da la Nova politica regiunala da la Confederaziun.
La secziun Rätia dal CAS posseda e tgira la chamona da Carschina CAS. L'edifizi è situà sin 2236 meters sur mar, al nord da St. Antönien sut la Sulzfluh sin il territori communal da Luzein en il Partenz. La chamona existenta duai vegnir mantegnida, cumplettada e sanada il meglier pussaivel. L'infrastructura da la chamona vegn optimada, quai cun equipar la chamona tenor il stadi da la tecnica il pli actual ed er cun tegnair quint d'aspects ecologics. Las lavurs da renovaziun duain cumenzar il 1. da zercladur 2025. La reavertura è previsa per la fin da l'onn 2026.
© Andrea Badrutt
La Regenza ha concedì a la secziun Rätia dal Club alpin svizzer (CAS) ina contribuziun da maximalmain 200 000 francs or da la finanziaziun speziala Sport per renovar la chamona da Carschina CAS. Ils custs totals da la renovaziun èn budgetads cun var 2,65 milliuns francs.
