Il dretg da polizia en il chantun Grischun duai vegnir actualisà. La finamira è che la Polizia chantunala possia proceder vinavant en moda efficazia ed effizienta cunter acts criminals ed impedir tals en il meglier cas. La Regenza ha dà en consultaziun duas revisiuns parzialas da la Lescha da polizia dal chantun Grischun.

Cun l'emprim project duain vegnir introducidas primarmain las basas giuridicas per il Management chantunal da smanatschas dal Grischun (MCS). Quest nov instrument da la polizia da segirezza duai gidar ad impedir grevs acts da violenza intenziunads. En quest connex sa tracti en spezial er da violenza a chasa, da violenza cunter autoritads, d'extremissem violent e da radicalissem sco er d'autras furmas da greva violenza.

Deescalar a temp
Studis cumprovan che delinquentas e delinquents mussan savens uschenumnads signals d'avertiment avant che commetter grevs acts da violenza intenziunads. Tals signals èn tipics per in'escalaziun. Cun il Management chantunal da smanatschas duai vegnir stabilì in sistem che promova l'identificaziun da tals signals d'avertiment e che procura, che quests signals d'avertiment vegnian annunziads a la Polizia chantunala. La Polizia chantunala survegn uschia la pussaivladad d'identifitgar a temp persunas prontas d'utilisar violenza. Ella po valitar en moda fidada la ristga che resorta da las persunas e neutralisar tras mesiras coordinadas sin plaun interdisciplinar. Per quest intent collavura la Polizia chantunala stretgamain cun autras autoritads, cun persunas spezialisadas, cun organisaziuns e persunas privatas che stattan en contact cun la persuna pronta d'utilisar violenza e cun sias victimas potenzialas.

Per pudair applitgar quest instrument da la polizia da segirezza en moda efficazia ed effizienta en il chantun Grischun, èsi necessari da precisar e d'extender las basas giuridicas concernent l'elavuraziun da datas.

Ultra da quai duai la Polizia chantunala survegnir la pussaivladad da pronunziar scumonds d'areal, d'avischinaziun e da contact cunter persunas periclitantas, sch'ins sto supponer – sin basa da las circumstanzas – che questas persunas commettian in malfatg cunter il corp, cunter la vita, cunter l'integritad sexuala u cunter la libertad u persequiteschian insatgi. Tras l'introducziun da questas mesiras spezialas cunter violenza, smanatschas u persecuziuns vegn il chantun Grischun a suandar la maioritad dals chantuns che han introducì mesiras polizialas correspundentas ils onns passads. Uschia vegn realisada ina incumbensa dal Cussegl grond concernent la creaziun d'ina basa legala en cas da stalking.

Las disposiziuns legalas correspundentas duain vegnir adattadas en il rom da questa revisiun.

Facilitar il barat da datas
Cun la segunda revisiun parziala da la Lescha da polizia duain vegnir actualisads plirs champs dal dretg da polizia. En emprima lingia duai vegnir facilità il barat da datas tranter las autoritads da segirezza. Smanatschas da la segirezza publica n'enconuschan nagins cunfins geografics. Per pudair sa defender cunter talas smanatschas, ston las autoritads da segirezza barattar infurmaziuns en ina moda uschè simpla e nunbirocratica sco pussaivel ina cun l'autra.

Per facilitar il barat d'infurmaziuns èn vegnids lantschads differents projects sin plaun interchantunal e naziunal, quai cun la finamira da colliar ina cun l'autra las bancas da datas chantunalas da polizia, uschia che las infurmaziuns polizialas pon vegnir consultadas directamain. Plinavant èn en elavuraziun differents sistems d'analisa criminala che duain permetter d'administrar e d'analisar las datas sin plaun interchantunal.

Da quests instruments po il chantun Grischun profitar mo, sch'il dretg da polizia porscha las basas giuridicas necessarias per quest intent. Uschenavant che questas basas giuridicas ston vegnir francadas sin il stgalim da la lescha, duain ellas vegnir stgaffidas cun questa revisiun.

Ils documents da consultaziun èn ussa disponibels
La consultaziun dura dal 1. da zercladur 2024 fin ils 31 da avust 2024. Ils documents respectivs èn disponibels sin la pagina d'internet dal chantun Grischun. Ultra da quai pon els vegnir empustads per telefon (tel. +41 81 257 25 13) tar il Departament da giustia, segirezza e sanadad.

Infurmaziuns:

Cusseglier guvernativ Peter Peyer, schef dal Departament da giustia, segirezza e sanadad, tel. +41 257 25 01 (cuntanschibel il glindesdi, ils 3 da zercladur da las 9.00 fin las 10.00), e‑mail Peter.Peyer@djsg.gr.ch