L'analisa gratuita da la situaziun professiunala per persunas sur 40 onns, «viamia», vegn cuntinuada fin almain l'onn 2028. Quai suenter che questa purschida è vegnida realisada cun success ils ultims 2 onns. Il chantun ha inoltrà a la Confederaziun ina dumonda correspundenta per pudair cuntinuar cun il project.

En vista al fatg ch'il mund da lavur sa transfurma svelt e per mantegnair la cumpetitivitad sin il martgà da lavur fin al pensiunament, vegni recumandà da concepir activamain l'atgna carriera. Persunas da 40 onns e dapli duain analisar regularmain lur situaziun professiunala e persunala, quai cun resguardar e reflectar davart las pretensiuns che sa midan sin il martgà da lavur. Uschia èsi pussaivel d'eruir a temp midadas professiunalas vegnintas u in eventual basegn da furmaziun supplementara sco er da planisar ils pass persunals per mantegnair la cumpetitivitad sin il martgà da lavur.

Realisà cun success il project ils onns 2022 e 2023
En il Grischun è l'Uffizi per la furmaziun professiunala cun ses otg posts regiunals da la Cussegliaziun da professiun, da studi e da carriera responsabel per il process da cussegliaziun. Ils onns 2022 e 2023 èn vegnids terminads tut en tut 206 cas da «viamia». 70 pertschient dals cas han pertutgà dunnas. Ina discrepanza envers la media svizra sa mussa tar il nivel da furmaziun. Entant che las absolventas ed ils absolvents da scolas autas furman – cun 39 pertschient – la pli gronda cumpart en la media svizra, èn quai 24 pertschient en il Grischun. 45 pertschient da las participantas e dals participants en il Grischun respectivamain 33 pertschient en la media svizra avevan in diplom da la furmaziun fundamentala professiunala. En la media svizra n'avevan 3 pertschient ed en il Grischun 6 pertschient da las participantas e dals participants nagina scolaziun. Las persunas cussegliadas, per gronda part en la vegliadetgna da 40 fin 50 onns, han dà en media ina nota da 5,5 a las cussegliaziuns da «viamia». Tut en tut sa mussi, che la purschida vegn tratga a niz ed appreziada en il Grischun.

Cuntinuaziun da «viamia» ils onns 2025 fin 2028
Tras la cuntinuaziun dal project «viamia» èsi pussaivel da consolidar la purschida introducida l'onn 2022 e da l'integrar fin la fin da l'onn 2028 en las structuras regularas. La Confederaziun subvenziunescha previsiblamain ina part dals custs per cuntinuar cun la purschida gratuita da «viamia» e vegn a pajar ina contribuziun pauschala per mintga cas da cussegliaziun. La realisaziun e la coordinaziun intrachantunala èn chaussa dals chantuns. Latiers tutga er la communicaziun, che na vegn betg pli cofinanziada da la Confederaziun. Igl è planisà ch'il Parlament federal decidia il pli tard en la sessiun d'enviern 2024 davart ils conclus finanzials e giuridics ch'èn colliads cun la missiva davart la promoziun da la furmaziun, da la perscrutaziun e da l'innovaziun 2025–2028 ed uschia davart l'ulteriur subvenziunament federal da «viamia».

Spetgà 450 clientas e clients ils onns 2025 fin 2028
L'Uffizi per la furmaziun professiunala quinta da pudair cussegliar circa 450 persunas durant la fasa da program 2025–2028. En il Grischun duai la gruppa da las persunas main qualifitgadas vegnir cuntanschida anc meglier. La purschida stat a disposiziun a tut las persunas da 40 onns e dapli che abitan en il chantun Grischun.

Ulteriuras infurmaziuns davart «viamia» èn publitgadas sin las paginas d'internet viamia.ch e links.viamia.ch/gr.

Infurmaziuns:

• President da la Regenza Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 02 (cuntanschibel da las 13.30 fin las 14.00), e‑mail Jondomenic.Parolini@ekud.gr.ch
• Petra Wyss, manadra da la partiziun Cussegliaziun da professiun, da studi e da carriera, Uffizi per la furmaziun professiunala, tel. +41 81 257 27 05 (cuntanschibla da las 13.30 fin las 15.30), e‑mail Petra.Wyss@afb.gr.ch