Il cumenzament da zercladur ha l'Uffizi chantunal da construcziun auta survegnì da la citad da Cuira la permissiun da construcziun per il nov Center da scola auta spezialisada dal Grischun. Quest term impurtant è la premissa per pudair cumenzar cun las lavurs da construcziun la primavaira 2025. L'avertura è previsa per l'onn 2028.

Var 3 mais suenter che l'Uffizi chantunal da construcziun auta aveva inoltrà a la citad da Cuira la dumonda da construcziun per il nov Center da scola auta spezialisada dal Grischun, ha l'Uffizi da construcziun auta da la citad dà glisch verda per il project da construcziun. «Il pli grond project da construcziun dal chantun è stà preparà bain ed en moda cumplessiva», constatescha la cussegliera da citad cumpetenta Sandra Maissen, ed ella agiuntescha: «Grazia a la collavuraziun excellenta tranter il chantun e la citad da Cuira ha la dumonda da construcziun pudì vegnir elavurada fitg spert.»

«Nus ans legrain fitg che nus avain – cun la permissiun da construcziun ch'è uss avant maun – cuntanschì il proxim term impurtant da quest project grond. Ussa pudain nus prender per mauns la realisaziun dal Center da scola auta spezialisada tenor il plan da termins», di l'architect chantunal Andreas Kohne.

Quest plan da termins sa preschenta sco suonda: La fin da l'atun 2024 è planisada l'emprima badigliada. Uschia vegn lantschà il cumenzament uffizial da la construcziun dal Center da scola auta spezialisada (CSASGR). Sche tut va tenor plan, vegn cumenzà l'onn 2028 cun il manaschi en il nov CSASGR. Gia avant intginas emnas han ins cumenzà a demontar ils edifizis existents ed a spustar il Mühlbach sin l'areal Pulvermühle a Cuira.

Visualisaziuns:

FHZGR Atrium Ost | FHZGR Atrium West | FHZGR Foyer 
© Giuliani Hönger Architekten

Infurmaziuns:

Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 13.00 fin las 16.00), e‑mail Andreas.Kohne@hba.gr.ch

Responsabladad: Uffizi da construcziun auta

Infurmaziuns cumplementaras davart il nov Center da scola auta spezialisada

Ils 12 da mars 2023 ha il pievel grischun approvà cun passa 83 pertschient il project «Realisaziun dal Center da scola auta spezialisada dal Grischun». Il project da votaziun per quest project cumpigliava in credit d'impegn da 151 milliuns francs. Las investiziuns totalas per il project duain importar var 178 milliuns francs. Il nov Center da scola auta spezialisada duai porscher plazza per var 2000 studentas e students sco er per 300 collavuraturas e collavuraturs che sa deditgeschan sin il nov campus a la Pulvermühle a Cuira a la perscrutaziun ed a l'instrucziun. La Scola auta spezialisada dal Grischun è l'otgavla scola auta spezialisada da dretg public independenta en Svizra. Oz è la Scola auta spezialisada repartida sin tschintg lieus en nov edifizis entaifer la citad da Cuira. Tras il nov edifizi vegnan l'instrucziun e la perscrutaziun unidas en in lieu sin il nov campus per las studentas ed ils students sco er per las collavuraturas ed ils collavuraturs. Realisà vegn il nov edifizi dal team general da planisaziun cun il project «PARTENARIS» sut la direcziun dal biro d'architectura Giuliani Hönger Architekten da Turitg. L'onn 2021 ha quest biro gudagnà la concurrenza da projects.